ಭುವನೇಶ್ವರ: ಮಾಜಿ ಸಂಸದ ನಳಿನ್ ಕುಮಾರ್ ಇದೀಗ ಒಡಿಶಾದಲ್ಲಿ ಕಮಾಲ್ ಪ್ರದರ್ಶಿಸುತ್ತಿದ್ದಾರೆ. ಒಡಿಶಾ ಬಿಜೆಪಿ ಉಸ್ತುವಾರಿಯಾಗಿ ನೇಮಕಗೊಂಡಿರುವ ಕರ್ನಾಟಕ ಬಿಜೆಪಿ ಮಾಜಿ ಅಧ್ಯಕ್ಷರೂ ಆದ ನಳಿನ್ ಕುಮಾರ್ ಕಟೀಲ್ ಕಳೆದ ಕೆಲವು ದಿನಗಳಿಂದ ಅವಿರತ ಪ್ರವಾಸ ಕೈಗೊಂಡಿದ್ದಾರೆ.
ಬಿಜೆಪಿ ಸದಸ್ಯತ್ವ ಅಭಿಯಾನದಲ್ಲಿ ಭಾಗಿಯಾಗಿ ಸ್ಥಳೀಯ ಮುಖಂಡರ ಸೈನ್ಯ ಕಟ್ಟಿರುವ ಕಟೀಲ್, ಭಾರೀ ಸಂಖ್ಯೆಯಲ್ಲಿ ಯುವಕರನ್ನು ಸೆಳೆಯುತ್ತಿದ್ದಾರೆ.
ಒಡಿಶಾದ ಸಾಂಪ್ರದಾಯಿಕ ಸಭೆಗಳಲ್ಲಿ ಭಾಗಿಯಾಗಿ, ಮೋದಿ ಸರ್ಕಾರದ ಸಾಧನೆಗಳನ್ನು ಅನಾವರಣ ಮಾಡುವ ಮೂಲಕ ಕುತೂಹಲದ ಕೇಂದ್ರಬಿಂದುವಾಗಿದ್ದಾರೆ. ಭುವನೇಶ್ವರ, ಕಟಕ್, ನೌಪಾಡಾ ಜಿಲ್ಲೆಗಳಲ್ಲಿ ಬಿಜೆಪಿ ಸದಸ್ಯತ್ವ ಅಭಿಯಾನವು ಪಕ್ಷದ ನಿರೀಕ್ಷೆಯನ್ನು ಮೀರಿ ಯಶಸ್ವಿಯಾಗಿ ಸಾಗಿದೆ.
ಮೋದಿ ಅವರೇ ಆದರ್ಶ ನಾಯಕ:
ಮೋದಿ ಅವರೇ ಆದರ್ಶ ನಾಯಕ: ಈ ಅಭಿಯಾನದ ನಡುವೆ ಮಾತನಾಡಿರುವ ನಳಿನ್ ಕುಮಾರ್ ಕಟೀಲ್, ಕೇಂದ್ರದಲ್ಲಿರುವ ನರೇಂದ್ರ ಮೋದಿ ಸರ್ಕಾರ ಕಳೆದ ಹತ್ತು ವರ್ಷಗಳಲ್ಲಿ ದೇಶದ ಪ್ರಗತಿಗೆ ಪೂರಕವಾದ ಕಾರ್ಯಕ್ರಮ ರೂಪಿಸಿದೆ. ಒಡಿಶಾ ರಾಜ್ಯದ ಅಭಿವೃದ್ಧಿಗೂ ಸಾಕಷ್ಟು ಕೊಡುಗೆ ನೀಡಿದ್ದಾರೆ ಎಂದರು.
ಮುಂಬರುವ ವಿವಿಧ ರಾಜ್ಯಗಳ ವಿಧಾನಸಭಾ ಚುನಾವಣೆಗಳಲ್ಲೂ ಮೋದಿ-ಅಮಿತ್ಶಾ-ನಡ್ಡಾ ನಾಯಕತ್ವಕ್ಕೆ ಜಯ ಸಿಗಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಒಡಿಶಾದಲ್ಲಿನ ಬಿಜೆಪಿ ಸದಸ್ಯತ್ವ ಅಭಿಯಾನ ಕುರಿತಂತೆ ಮಾಹಿತಿ ಹಂಚಿಕೊಂಡ ನಳಿನ್ ಕುಮಾರ್ ಕಟೀಲ್, ಗ್ರಾಮ ಗ್ರಾಮಗಳಲ್ಲಿಯೂ ಜನಸಾಮಾನ್ಯರು ಸಂಘಟಿತರಾಗಿ ಭಾಜಪಾ ಸದಸ್ಯತ್ವ ಅಭಿಯಾನದ ಯಶಸ್ಸಿಗಾಗಿ ತಮ್ಮನ್ನು ಜೋಡಿಸಿಕೊಳ್ಳುವ ಮೂಲಕ ಪಕ್ಷದ ಮುಖಂಡರು, ಕಾರ್ಯಕರ್ತರಲ್ಲಿ ಹೆಚ್ಚಿನ ಉತ್ಸಾಹವನ್ನು ತುಂಬುತ್ತಿದ್ದಾರೆ. ಒಡಿಶಾ ರಾಜ್ಯದ ಧರ್ಮಗ್ರಹ ವಿಧಾನಸಭಾ ಕ್ಷೇತ್ರದ ಚಿಲ್ಪಾ ಗ್ರಾಮ, ಪಾರ್ಲಾ ಗ್ರಾಮ, ನಾಬಾರಂದ್ಲಾಪುರ ಜಿಲ್ಲೆಯ ಅಭಿಯಾನದ ಸಭೆಯಲ್ಲಿ ಈ ವಾತಾವರಣ ಕಂಡು ಬಂದಿದೆ ಎಂದಿದ್ದಾರೆ.
ಒಡಿಶಾದ ಧರ್ಮಾಗ್ರಹ ಶಾಸಕರಾದ ಸುಧೀರ್ ರಂಜನ್ ಪಟ್ಟಜೋಷಿ, ಶಾಸಕರಾದ ಗೌರಿ ಶಂಕರ್, ಮಾಜಿ ಸಂಸದರಾದ ಪರಶುರಾಮ್ ಮಾಂಝಿ, ಪ್ರಮುಖರಾದ ಶ್ರೀ ಹೀಮಾಂಶು ಶೇಖ‌ರ್ ಮೆಹ್ರಾ, ಆಟ್ರ್ರಾರಾಮ ಮಹಾಪಾತ್ರ, ಧನಂಜಯ ಪಾತ್ರ, ಜಗದೀಶ್ ಬಿಸೋಯಿ, ಅಚ್ಯುತಾನಂದ ಬಿಸೋಯಿ ಸಹಿತ ಅನೇಕ ಮುಖಂಡರು ನಳಿನ್ ಕುಮಾರ್ ಅವರಿಗೆ ಸಾಥ್ ನೀಡಿದ್ದಾರೆ..
