ವಾಷಿಂಗ್ಟನ್: ಜಾಗತಿಕ ಉದ್ವಿಗ್ನತೆಯ ನಡುವೆಯೇ ಅಮೆರಿಕನಲ್ಲಿ ಮಹತ್ವದ ಬೆಳವಣಿಗೆ ಕಂಡುಬಂದಿದ್ದು, ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಸೇನಾ ಮುಖ್ಯಸ್ಥ ಜನರಲ್ ರಾಂಡಿ ಜಾರ್ಜ್ ಅವರನ್ನು ಪದಚ್ಯುತಗೊಳಿಸಿದ್ದಾರೆ.
ಪೆಂಟಗನ್ ಪ್ರಕಟಣೆಯ ಪ್ರಕಾರ, ಜನರಲ್ ರಾಂಡಿ ಜಾರ್ಜ್ ತಕ್ಷಣದಿಂದ ಜಾರಿಗೆ ಬರುವಂತೆ ತಮ್ಮ ಹುದ್ದೆಯಿಂದ ನಿವೃತ್ತರಾಗಿದ್ದಾರೆ. ದಶಕಗಳ ಕಾಲ ಸೇವೆ ಸಲ್ಲಿಸಿದ ಅವರ ಕೊಡುಗೆಗೆ ರಕ್ಷಣಾ ಇಲಾಖೆ ಕೃತಜ್ಞತೆ ವ್ಯಕ್ತಪಡಿಸಿದೆ.
ಮೂಲಗಳ ಪ್ರಕಾರ, ಹೆಗ್ಸೆತ್ ಅವರೇ ಜಾರ್ಜ್ ಅವರಿಗೆ ರಾಜೀನಾಮೆ ನೀಡುವಂತೆ ಸೂಚಿಸಿದ್ದು, ಈ ಕ್ರಮ ಪೆಂಟಗನ್ನಲ್ಲಿ ಅಲುಗಾಡುವಿಕೆಗೆ ಕಾರಣವಾಗಿದೆ. ಜಾರ್ಜ್ ಅವರ ಸ್ಥಾನಕ್ಕೆ ಉಪ ಮುಖ್ಯಸ್ಥ ಜನರಲ್ ಕ್ರಿಸ್ಟೋಫರ್ ಲಾನೆವ್ ಅವರನ್ನು ಹಂಗಾಮಿ ಮುಖ್ಯಸ್ಥರಾಗಿ ನೇಮಿಸಲಾಗಿದೆ.
ಸೆಪ್ಟೆಂಬರ್ 2023ರಲ್ಲಿ ಸೇನಾ ಮುಖ್ಯಸ್ಥರಾಗಿ ಅಧಿಕಾರ ವಹಿಸಿಕೊಂಡಿದ್ದ ಜಾರ್ಜ್ ಅವರ ಅವಧಿ ಇನ್ನೂ ಉಳಿದಿದ್ದರೂ, ಅವರನ್ನು ಹಠಾತ್ ಬದಲಾಯಿಸಿರುವುದು ಚರ್ಚೆಗೆ ಗ್ರಾಸವಾಗಿದೆ. ಇದೇ ವೇಳೆ ಇನ್ನೂ ಇಬ್ಬರು ಹಿರಿಯ ಸೇನಾ ಅಧಿಕಾರಿಗಳನ್ನು ಸಹ ಸ್ಥಾನದಿಂದ ದೂರ ಮಾಡಲಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ.
ಈ ನಿರ್ಧಾರ ರಾಜಕೀಯ ವಲಯದಲ್ಲೂ ತೀವ್ರ ಪ್ರತಿಕ್ರಿಯೆ ಹುಟ್ಟಿಸಿದೆ. ಕಾಂಗ್ರೆಸ್ ಸದಸ್ಯ ಯುಜೀನ್ ವಿಂಡ್ಮನ್, “ಜನರಲ್ ಜಾರ್ಜ್ ಒಬ್ಬ ಸಮರ್ಥ ನಾಯಕ” ಎಂದು ಹೇಳಿ, ಈ ಕ್ರಮವನ್ನು ಟೀಕಿಸಿದ್ದಾರೆ.
ಇತ್ತೀಚೆಗೆ ಅಪಾಚೆ ಹೆಲಿಕಾಪ್ಟರ್ ಸಿಬ್ಬಂದಿ ಸಂಬಂಧಿತ ಪ್ರಕರಣದಲ್ಲಿ ಹೆಗ್ಸೆತ್ ನೇರವಾಗಿ ಹಸ್ತಕ್ಷೇಪ ಮಾಡಿದ ವಿಚಾರವೂ ವಿವಾದಕ್ಕೆ ಕಾರಣವಾಗಿತ್ತು. “ತನಿಖೆ ಬೇಡ, ಶಿಕ್ಷೆ ಬೇಡ” ಎಂಬ ಅವರ ಹೇಳಿಕೆ ಗಮನ ಸೆಳೆದಿತ್ತು.
ಪದಚ್ಯುತಿ ಹಿಂದೆ ನಿಖರ ಕಾರಣಗಳನ್ನು ಪೆಂಟಗನ್ ಬಹಿರಂಗಪಡಿಸಿಲ್ಲ. ಸೇನಾ ಮುಖ್ಯಸ್ಥರ ಹುದ್ದೆ ಅಮೆರಿಕದ ಅತ್ಯಂತ ಪ್ರಮುಖ ಸೈನಿಕ ಹುದ್ದೆಗಳಲ್ಲಿ ಒಂದಾಗಿದ್ದು, ಈ ಮಟ್ಟದ ಬದಲಾವಣೆಗಳು ಸಾಮಾನ್ಯವಾಗಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ.
