ಮೀರತ್: ಭಾರತೀಯ ವಾಯುಪಡೆಯ ಪ್ರತಿಷ್ಠಿತ ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡ (SKAT) ಸೆಪ್ಟೆಂಬರ್ 19 ಮತ್ತು 20ರಂದು ಮೀರತ್ನಲ್ಲಿ ಚೊಚ್ಚಲ ವೈಮಾನಿಕ ಪ್ರದರ್ಶನ ನೀಡಿದ್ದು, ಎರಡು ದಿನಗಳ ಕಸರತ್ತಿಗೆ ಒಂದು ಲಕ್ಷಕ್ಕೂ ಅಧಿಕ ಮಂದಿ ಸಾಕ್ಷಿಯಾದರು.
ಒಂಬತ್ತು ವಿಮಾನಗಳ ತಂಡ ಆಕಾಶದಲ್ಲಿ ನಡೆಸಿದ ನಿಖರ ಹಾಗೂ ಸಾಹಸಮಯ ವೈಮಾನಿಕ ಕಸರತ್ತುಗಳು ಪ್ರೇಕ್ಷಕರ ಗಮನ ಸೆಳೆದವು. ವಿದ್ಯಾರ್ಥಿಗಳು, ಎನ್ಸಿಸಿ ಕೆಡೆಟ್ಗಳು ಹಾಗೂ ಎನ್ಎಸ್ಎಸ್ ಸ್ವಯಂಸೇವಕರು ಸೇರಿದಂತೆ ಸಾವಿರಾರು ಮಂದಿ ಪ್ರದರ್ಶನ ವೀಕ್ಷಿಸಲು ಆಗಮಿಸಿದ್ದರು.
ಸೆಪ್ಟೆಂಬರ್ 20ರಂದು ರಕ್ಷಣಾ ಖಾತೆ ರಾಜ್ಯ ಸಚಿವ ಸಂಜಯ್ ಸೇಠ್ ಪ್ರದರ್ಶನ ವೀಕ್ಷಿಸಿದರು. ‘ಎಕ್ಸ್’ನಲ್ಲಿ ಪ್ರತಿಕ್ರಿಯಿಸಿರುವ ಅವರು, ಸೂರ್ಯಕಿರಣ್ ತಂಡದ ಪ್ರದರ್ಶನವು ಶಿಸ್ತು, ನಿಖರತೆ, ತಂಡದ ಸಹಕಾರ ಮತ್ತು ವೃತ್ತಿಪರತೆಯ ಪ್ರತೀಕ ಎಂದು ಬಣ್ಣಿಸಿದ್ದಾರೆ.
ತಂಡದ ಮೂರು ದಶಕಗಳ ಪಯಣ ಹಾಗೂ ಭಾರತ ಮತ್ತು ವಿದೇಶಗಳಲ್ಲಿ 800ಕ್ಕೂ ಅಧಿಕ ವೈಮಾನಿಕ ಪ್ರದರ್ಶನಗಳನ್ನು ನೀಡಿರುವ ದಾಖಲೆಯನ್ನೂ ಅವರು ಉಲ್ಲೇಖಿಸಿದ್ದಾರೆ.
ಮೊದಲ ದಿನದ ಪ್ರದರ್ಶನ ವೀಕ್ಷಿಸಿದ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಪೈಲಟ್ಗಳ ನಿಖರತೆ ಮತ್ತು ಧೈರ್ಯವನ್ನು ಶ್ಲಾಘಿಸಿದ್ದಾರೆ. ತ್ರಿವರ್ಣ ಧ್ವಜದ ಬಣ್ಣಗಳಲ್ಲಿ ವಿಮಾನಗಳು ಆಕಾಶದಲ್ಲಿ ಮೂಡಿಸಿದ ವಿನ್ಯಾಸಗಳು ಸೇರಿದಂತೆ ಪ್ರದರ್ಶನವನ್ನು ಅವರು ಸ್ಫೂರ್ತಿದಾಯಕ ಎಂದು ಹೇಳಿದ್ದಾರೆ.
2026ರ ತರಬೇತಿ ಅವಧಿ ಪೂರ್ಣಗೊಳಿಸಿದ ಬಳಿಕ SKAT ಮೀರತ್ನಲ್ಲಿ ಈ ಪ್ರದರ್ಶನ ನೀಡಿದೆ. ಕೆಂಪು-ಬಿಳಿ ಬಣ್ಣದ ಒಂಬತ್ತು ಹಾಕ್ Mk 132 ವಿಮಾನಗಳು ಇದರಲ್ಲಿ ಭಾಗವಹಿಸಿದ್ದವು. ಈ ವಿಮಾನಗಳನ್ನು ಭಾರತದಲ್ಲಿ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (HAL) ಪರವಾನಗಿ ಅಡಿಯಲ್ಲಿ ತಯಾರಿಸಲಾಗುತ್ತದೆ.
ಲೂಪ್, ಬ್ಯಾರೆಲ್ ರೋಲ್, ತಲೆಕೆಳಗಿನ ಹಾರಾಟ ಹಾಗೂ ತಂಡದ ವಿಶೇಷ ‘DNA ರಚನೆ’ ಸೇರಿದಂತೆ ಹಲವು ಕಸರತ್ತುಗಳನ್ನು ಪೈಲಟ್ಗಳು ಪ್ರದರ್ಶಿಸಿದರು. ಕೆಲವು ಕಸರತ್ತುಗಳ ವೇಳೆ ವಿಮಾನಗಳು ಪರಸ್ಪರ ಐದು ಮೀಟರ್ಗಿಂತಲೂ ಕಡಿಮೆ ಅಂತರದಲ್ಲಿ ಹಾರಾಟ ನಡೆಸಿದ್ದು, ಪೈಲಟ್ಗಳ ನಡುವಿನ ಅತ್ಯಂತ ನಿಖರ ಸಮನ್ವಯ ಅಗತ್ಯವಾಗಿತ್ತು.
ಹಾಕ್ ವಿಮಾನಗಳಿಗೆ ಕೇಸರಿ, ಬಿಳಿ ಮತ್ತು ಹಸಿರು ಬಣ್ಣದ ಹೊಗೆ ಹೊರಸೂಸುವ ದೇಶೀಯವಾಗಿ ಅಭಿವೃದ್ಧಿಪಡಿಸಿದ ಸ್ಮೋಕ್ ಪಾಡ್ಗಳನ್ನು ಅಳವಡಿಸಲಾಗಿದೆ. ನಾಸಿಕ್ನ ಭಾರತೀಯ ವಾಯುಪಡೆಯ ಬೇಸ್ ರಿಪೇರಿ ಡಿಪೋದಲ್ಲಿ ಈ ಮಾರ್ಪಾಡುಗಳನ್ನು ಕೈಗೊಳ್ಳಲಾಗಿದೆ.
1996ರಲ್ಲಿ ಸ್ಥಾಪನೆಯಾದ ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡವು ಏಷ್ಯಾದ ಏಕೈಕ ಒಂಬತ್ತು ವಿಮಾನಗಳ ಏರೋಬ್ಯಾಟಿಕ್ ತಂಡವಾಗಿದೆ ಎಂದು ಭಾರತೀಯ ವಾಯುಪಡೆ ತಿಳಿಸಿದೆ.
ಮೂರು ದಶಕಗಳ ಅವಧಿಯಲ್ಲಿ ಭಾರತದಲ್ಲಿ 800ಕ್ಕೂ ಅಧಿಕ ಪ್ರದರ್ಶನಗಳನ್ನು ನೀಡಿರುವ ತಂಡವು ಚೀನಾ, ಶ್ರೀಲಂಕಾ, ಮ್ಯಾನ್ಮಾರ್, ಥಾಯ್ಲೆಂಡ್, ಸಿಂಗಾಪುರ ಮತ್ತು ಯುಎಇ ಸೇರಿದಂತೆ ಹಲವು ದೇಶಗಳ ಅಂತಾರಾಷ್ಟ್ರೀಯ ಏರ್ಶೋಗಳಲ್ಲೂ ಭಾಗವಹಿಸಿದೆ.
ವಾಯುಪಡೆಯ ವೈಮಾನಿಕ ಸಾಮರ್ಥ್ಯವನ್ನು ಜನರಿಗೆ ಪರಿಚಯಿಸುವುದರ ಜತೆಗೆ, ಯುವಜನರಲ್ಲಿ ಸಶಸ್ತ್ರ ಪಡೆಗಳ ಕುರಿತು ಆಸಕ್ತಿ ಮೂಡಿಸುವುದು SKAT ಪ್ರದರ್ಶನಗಳ ಪ್ರಮುಖ ಉದ್ದೇಶಗಳಲ್ಲಿ ಒಂದಾಗಿದೆ.
