ನೆದರ್ಲ್ಯಾಂಡ್ಸ್: ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರು ನೆದರ್ಲ್ಯಾಂಡ್ಸ್ ಪ್ರಧಾನಿ ರಾಬ್ ಜೆಟ್ಟನ್ (Rob Jetten) ಅವರೊಂದಿಗೆ ಐಕಾನಿಕ್ ಅಫ್ಸ್ಲುಯಿಟ್ಡಿಜ್ಕ್ (Afsluitdijk) ಅಣೆಕಟ್ಟಿಗೆ ಭೇಟಿ ನೀಡಿ, ಜಲ ನಿರ್ವಹಣೆ ಮತ್ತು ಹವಾಮಾನ ಸ್ಥಿತಿಸ್ಥಾಪಕ ಮೂಲಸೌಕರ್ಯ ಕ್ಷೇತ್ರಗಳಲ್ಲಿ ಎರಡೂ ದೇಶಗಳ ಸಹಕಾರವನ್ನು ಮತ್ತಷ್ಟು ಬಲಪಡಿಸಿದರು.
32 ಕಿಲೋಮೀಟರ್ ಉದ್ದದ ಅಫ್ಸ್ಲುಯಿಟ್ಡಿಜ್ಕ್ ಅಣೆಕಟ್ಟು ಜಾಗತಿಕ ಮಟ್ಟದಲ್ಲಿ ಪ್ರವಾಹ ನಿಯಂತ್ರಣ ಮತ್ತು ಭೂ ಸುಧಾರಣೆಯ ಮಾದರಿಯೆಂದು ಪರಿಗಣಿಸಲಾಗಿದೆ. ಇದು ಉತ್ತರ ಸಮುದ್ರದ ನೀರಿನಿಂದ ನೆದರ್ಲ್ಯಾಂಡ್ಸ್ನ ಹಲವು ಭಾಗಗಳನ್ನು ರಕ್ಷಿಸುವುದರ ಜೊತೆಗೆ ಸಿಹಿನೀರಿನ ಸಂಗ್ರಹಣೆಯಲ್ಲೂ ಪ್ರಮುಖ ಪಾತ್ರ ವಹಿಸುತ್ತದೆ.
ಭೇಟಿಯ ವೇಳೆ, ಗುಜರಾತ್ನಲ್ಲಿ ಭಾರತ ಕೈಗೆತ್ತಿಕೊಳ್ಳಲು ಉದ್ದೇಶಿಸಿರುವ ‘ಕಲ್ಪಸರ್’ ಯೋಜನೆ ಕುರಿತು ಇಬ್ಬರು ನಾಯಕರು ಚರ್ಚಿಸಿದರು. ಖಂಭತ್ ಕೊಲ್ಲಿಯಲ್ಲಿ ಬೃಹತ್ ಸಿಹಿನೀರಿನ ಜಲಾಶಯ ನಿರ್ಮಾಣ, ಉಬ್ಬರವಿಳಿತದ ವಿದ್ಯುತ್ ಉತ್ಪಾದನೆ, ನೀರಾವರಿ ಮತ್ತು ಸಾರಿಗೆ ಸೌಲಭ್ಯಗಳನ್ನು ಒಳಗೊಂಡಿರುವ ಈ ಯೋಜನೆಗೆ ಡಚ್ ತಾಂತ್ರಿಕ ಪರಿಣತಿ ಸಹಕಾರಿಯಾಗಲಿದೆ ಎಂದು ತಿಳಿಸಲಾಯಿತು.
ಈ ಸಂದರ್ಭದಲ್ಲಿ, ಕಲ್ಪಸರ್ ಯೋಜನೆಗೆ ತಾಂತ್ರಿಕ ಸಹಕಾರ ಒದಗಿಸಲು ಭಾರತದ ಜಲಶಕ್ತಿ ಸಚಿವಾಲಯ ಮತ್ತು ಡಚ್ ಮೂಲಸೌಕರ್ಯ ಹಾಗೂ ನೀರು ನಿರ್ವಹಣಾ ಸಚಿವಾಲಯಗಳ ನಡುವೆ ಉದ್ದೇಶ ಪತ್ರಕ್ಕೆ ಸಹಿ ಹಾಕಿರುವುದನ್ನು ಎರಡೂ ದೇಶಗಳು ಸ್ವಾಗತಿಸಿವೆ.
ಭಾರತದ ದೊಡ್ಡ ಮಟ್ಟದ ಅನುಷ್ಠಾನ ಸಾಮರ್ಥ್ಯ ಮತ್ತು ನೆದರ್ಲ್ಯಾಂಡ್ಸ್ನ ಹೈಡ್ರಾಲಿಕ್ ಎಂಜಿನಿಯರಿಂಗ್ ಪರಿಣತಿ ಪರಸ್ಪರ ಸಹಕಾರಕ್ಕೆ ಹೊಸ ಅವಕಾಶಗಳನ್ನು ತೆರೆದಿವೆ ಎಂದು ಎರಡೂ ದೇಶಗಳು ಅಭಿಪ್ರಾಯಪಟ್ಟಿವೆ.
