ನವದೆಹಲಿ: ಡಿಜಿಲಾಕರ್ ಏಕೀಕರಣ ಮತ್ತು ಡಿಜಿಟಲ್ ಆಡಳಿತ ಕ್ಷೇತ್ರದಲ್ಲಿ ಅತ್ಯುತ್ತಮ ಸಾಧನೆಗಾಗಿ ಗುಜರಾತ್, ಕರ್ನಾಟಕ, ಕೇರಳ, ನಾಗಾಲ್ಯಾಂಡ್ ಮತ್ತು ರಾಜಸ್ಥಾನ ರಾಜ್ಯಗಳಿಗೆ ರಾಷ್ಟ್ರೀಯ ಇ-ಆಡಳಿತ ವಿಭಾಗ (NeGD) ಪ್ರಶಸ್ತಿ ನೀಡಿ ಸನ್ಮಾನಿಸಿದೆ.
ಮೇ 11ರಂದು ನಡೆದ “ರಾಜ್ಯ ದತ್ತಾಂಶಕ್ಕಾಗಿ ಸೈಬರ್ ಭದ್ರತಾ ಚೌಕಟ್ಟು ಬಲಪಡಿಸುವ” ರಾಷ್ಟ್ರೀಯ ಕಾರ್ಯಾಗಾರದಲ್ಲಿ ಈ ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಯಿತು. ಡಿಜಿಟಲ್ ಆಡಳಿತ ವಿಭಾಗದ ಜಂಟಿ ಕಾರ್ಯದರ್ಶಿ ಹಾಗೂ NeGD ಅಧ್ಯಕ್ಷ-ಸಿಇಒ ನಂದ ಕುಮಾರಮ್ ಪ್ರಶಸ್ತಿ ವಿತರಿಸಿದರು.
ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ ಪ್ರಕಾರ, ವಿವಿಧ ಸರ್ಕಾರಿ ಸೇವೆಗಳೊಂದಿಗೆ ಡಿಜಿಲಾಕರ್ ಯಶಸ್ವಿಯಾಗಿ ಸಂಯೋಜಿಸಿ, ನಾಗರಿಕರಿಗೆ ದಾಖಲೆಗಳನ್ನು ಡಿಜಿಟಲ್ ರೂಪದಲ್ಲಿ ಸುಲಭವಾಗಿ ಲಭ್ಯವಾಗುವಂತೆ ಮಾಡಿದಕ್ಕಾಗಿ ರಾಜ್ಯಗಳನ್ನು ಗುರುತಿಸಲಾಗಿದೆ.
ಕರ್ನಾಟಕದಲ್ಲಿ ಶೇಕಡಾ 73ರಷ್ಟು ಸರ್ಕಾರಿ ಇ-ಸೇವೆಗಳನ್ನು ಡಿಜಿಲಾಕರ್ಗೆ ಜೋಡಿಸಲಾಗಿದ್ದು, 2.7 ಕೋಟಿಗೂ ಹೆಚ್ಚು ಬಳಕೆದಾರರು ನೋಂದಾಯಿಸಿಕೊಂಡಿದ್ದಾರೆ. ರಾಜ್ಯದ ಎಲ್ಲಾ ಐದು ಡಿಸ್ಕಾಂಗಳನ್ನು ಸಂಯೋಜಿಸಿ ಸುಮಾರು 3 ಕೋಟಿ ವಿದ್ಯುತ್ ಬಿಲ್ ದಾಖಲೆಗಳನ್ನು ಡಿಜಿಟಲೀಕರಣಗೊಳಿಸಲಾಗಿದೆ.
ಗುಜರಾತ್ನಲ್ಲಿ ಶೇ.65ರಷ್ಟು ಸೇವೆಗಳು ಡಿಜಿಲಾಕರ್ಗೆ ಜೋಡಿಸಲ್ಪಟ್ಟಿದ್ದು, 1.92 ಕೋಟಿಗೂ ಹೆಚ್ಚು ನಾಗರಿಕರಿಗೆ ಡಿಜಿಟಲ್ ಸೇವೆ ತಲುಪಿದೆ.
ಕೇರಳ ಕೇವಲ ಏಳು ದಿನಗಳಲ್ಲಿ 117ಕ್ಕೂ ಹೆಚ್ಚು ಸೇವೆಗಳನ್ನು ಸಂಯೋಜಿಸಿದ್ದು, 1.15 ಕೋಟಿಗೂ ಹೆಚ್ಚು ಬಳಕೆದಾರರಿಗೆ ಸೇವೆ ಒದಗಿಸುತ್ತಿದೆ.
“ಡಿಜಿಟಲ್ ರೈಸಿಂಗ್ ಸ್ಟೇಟ್” ಎಂದು ಗುರುತಿಸಲ್ಪಟ್ಟ ನಾಗಾಲ್ಯಾಂಡ್, ಒಂದು ತಿಂಗಳೊಳಗೆ 32ಕ್ಕೂ ಹೆಚ್ಚು ಸೇವೆಗಳನ್ನು ಡಿಜಿಲಾಕರ್ಗೆ ಜೋಡಿಸಿದೆ.
ರಾಜಸ್ಥಾನದಲ್ಲಿ ಜನ್ ಆಧಾರ್ ಯೋಜನೆಯನ್ನು ಡಿಜಿಲಾಕರ್ಗೆ ಸಂಯೋಜಿಸಲಾಗಿದ್ದು, 7.5 ಕೋಟಿಗೂ ಹೆಚ್ಚು ನಾಗರಿಕರಿಗೆ ಪ್ರಯೋಜನವಾಗಿದೆ.
