ಮುಂಬೈ: ದೇಶದಲ್ಲಿ ಕಾರ್ಪೊರೇಟ್ ಆಡಳಿತ, ESG (ಪರಿಸರ, ಸಾಮಾಜಿಕ ಮತ್ತು ಆಡಳಿತಾತ್ಮಕ) ಅಭ್ಯಾಸಗಳು ಹಾಗೂ ಬಂಡವಾಳ ಮಾರುಕಟ್ಟೆಗಳನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಸೆಕ್ಯುರಿಟೀಸ್ ಅಂಡ್ ಎಕ್ಸ್ಚೇಂಜ್ ಬೋರ್ಡ್ ಆಫ್ ಇಂಡಿಯಾ (SEBI) ಸ್ಥಾಪಿತ ರಾಷ್ಟ್ರೀಯ ಸೆಕ್ಯುರಿಟೀಸ್ ಮಾರ್ಕೆಟ್ಸ್ ಸಂಸ್ಥೆ (NISM) ಮತ್ತು ಭಾರತೀಯ ಕಾರ್ಪೊರೇಟ್ ವ್ಯವಹಾರಗಳ ಸಂಸ್ಥೆ (IICA) ನಡುವೆ ಮಹತ್ವದ ತಿಳುವಳಿಕೆ ಒಪ್ಪಂದಕ್ಕೆ (MoU) ಸಹಿ ಹಾಕಲಾಗಿದೆ.
ಮೇ 19 ರಂದು ಮುಂಬೈನಲ್ಲಿ ನಡೆದ ಕಾರ್ಯಕ್ರಮದಲ್ಲಿ SEBI ಅಧ್ಯಕ್ಷ ತುಹಿನ್ ಕಾಂತ ಪಾಂಡೆ ಅವರ ಸಮ್ಮುಖದಲ್ಲಿ ಒಪ್ಪಂದಕ್ಕೆ ಸಹಿ ಹಾಕಲಾಯಿತು.
ಒಪ್ಪಂದದಡಿ SEBI ಅಧಿಕಾರಿಗಳು, ನಿಯಂತ್ರಕ ಸಂಸ್ಥೆಗಳು ಹಾಗೂ ಹಣಕಾಸು ವಲಯದ ಅಧಿಕಾರಿಗಳಿಗೆ ಜಂಟಿಯಾಗಿ ಸಾಮರ್ಥ್ಯ ವೃದ್ಧಿ ಕಾರ್ಯಕ್ರಮಗಳು, ಪ್ರಮಾಣೀಕರಣ ಕೋರ್ಸ್ಗಳು, ಕಾರ್ಯನಿರ್ವಾಹಕ ಶಿಕ್ಷಣ ಮತ್ತು ವಿಶೇಷ ತರಬೇತಿ ಕಾರ್ಯಕ್ರಮಗಳನ್ನು ಆಯೋಜಿಸಲು ಎರಡೂ ಸಂಸ್ಥೆಗಳು ಕೈಜೋಡಿಸಲಿವೆ.
ಈ ಸಂದರ್ಭದಲ್ಲಿ ಮಾತನಾಡಿದ ತುಹಿನ್ ಕಾಂತ ಪಾಂಡೆ, ಕಾರ್ಯಕ್ಷಮತೆ ಆಧಾರಿತ ಕಾರ್ಪೊರೇಟ್ ಆಡಳಿತ ವ್ಯವಸ್ಥೆ ನಿರ್ಮಾಣ, MSMEಗಳಿಗೆ ಬಂಡವಾಳ ಮಾರುಕಟ್ಟೆ ಪ್ರವೇಶ ಸುಧಾರಣೆ, ಸುಸ್ಥಿರತೆಯ ಬಹಿರಂಗಪಡಿಸುವಿಕೆ ಬಲಪಡಿಸುವುದು ಹಾಗೂ ಉದಯೋನ್ಮುಖ ನಿಯಂತ್ರಣ ಕ್ಷೇತ್ರಗಳಲ್ಲಿ ಪುರಾವೆ ಆಧಾರಿತ ಸಂಶೋಧನೆಗೆ ಉತ್ತೇಜನ ನೀಡುವ ಅಗತ್ಯವನ್ನು ಒತ್ತಿ ಹೇಳಿದರು.
ಐಐಸಿಎ ಮಹಾನಿರ್ದೇಶಕ ಮತ್ತು ಸಿಇಒ ಜ್ಞಾನೇಶ್ವರ್ ಕುಮಾರ್ ಸಿಂಗ್ ಮಾರ್ಗದರ್ಶನದಲ್ಲಿ ಈ ಸಹಯೋಗ ರೂಪುಗೊಂಡಿದ್ದು, ಜವಾಬ್ದಾರಿಯುತ ವ್ಯವಹಾರ ಪದ್ಧತಿಗಳು ಮತ್ತು ESG ಆಧಾರಿತ ಅಭಿವೃದ್ಧಿ ಗುರಿಗಳನ್ನು ಉತ್ತೇಜಿಸುವತ್ತ ಗಮನ ಹರಿಸಲಾಗಿದೆ.
NISM ರಿಜಿಸ್ಟ್ರಾರ್ ಯೋಗಿತಾ ಜಾಧವ್ ಮತ್ತು IICA ಬಿಸಿನೆಸ್ ಎನ್ವಿರಾನ್ಮೆಂಟ್ ಶಾಲೆಯ ಮುಖ್ಯಸ್ಥೆ ಡಾ. ಗರಿಮಾ ದಧಿಚ್ ಒಪ್ಪಂದಕ್ಕೆ ಸಹಿ ಹಾಕಿದರು. ಕಾರ್ಯಕ್ರಮದಲ್ಲಿ NISM ನಿರ್ದೇಶಕಿ ಶಶಿ ಕೃಷ್ಣನ್ ಸಹ ಉಪಸ್ಥಿತರಿದ್ದರು.
ಈ ಒಪ್ಪಂದದಡಿ ಸೆಕ್ಯುರಿಟೀಸ್ ಮಾರುಕಟ್ಟೆಗಳು, ESG ವರದಿ, ಬಿಸಿನೆಸ್ ರೆಸ್ಪಾನ್ಸಿಬಿಲಿಟಿ ಅಂಡ್ ಸಸ್ಟೇನಬಿಲಿಟಿ ರಿಪೋರ್ಟಿಂಗ್ (BRSR), ದಿವಾಳಿತನ ನಿರ್ವಹಣೆ, ಹೂಡಿಕೆದಾರರ ಶಿಕ್ಷಣ, ಸುಸ್ಥಿರ ಹಣಕಾಸು, ಮಂಡಳಿ ಆಡಳಿತ ಮತ್ತು ಮಾರುಕಟ್ಟೆ ಸಮಗ್ರತೆ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ದೀರ್ಘಕಾಲೀನ ಸಹಕಾರಕ್ಕೆ ಉತ್ತೇಜನ ನೀಡಲಾಗುತ್ತದೆ.
ಇದಲ್ಲದೆ ನೀತಿ ಅಧ್ಯಯನಗಳು, ಸಂಶೋಧನಾ ಯೋಜನೆಗಳು, ಪಠ್ಯಕ್ರಮ ವಿನ್ಯಾಸ, ಅಧ್ಯಾಪಕರ ವಿನಿಮಯ, ಸಮ್ಮೇಳನಗಳು ಮತ್ತು ಪ್ರಕಟಣೆಗಳ ಕ್ಷೇತ್ರದಲ್ಲಿಯೂ ಎರಡೂ ಸಂಸ್ಥೆಗಳು ಸಹಕರಿಸಲಿವೆ.
ಭಾರತದ ಕಾರ್ಪೊರೇಟ್ ಮತ್ತು ಹಣಕಾಸು ವಲಯಗಳಿಗೆ ಹೆಚ್ಚು ಪಾರದರ್ಶಕ, ಜ್ಞಾನ ಆಧಾರಿತ ಮತ್ತು ಅಂತರ್ಗತ ಪರಿಸರ ವ್ಯವಸ್ಥೆ ನಿರ್ಮಾಣಕ್ಕೆ ಈ ಪಾಲುದಾರಿಕೆ ನೆರವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.
