ಮುಂಬೈ: ವರ್ಲ್ಡ್ ಪ್ಯಾಡೆಲ್ ಲೀಗ್ ಸೀಸನ್‌–3ರ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಬಾಲಿವುಡ್‌ ನಟ ಸಲ್ಮಾನ್ ಖಾನ್ ಅಚ್ಚರಿಯ ಹೇಳಿಕೆ ನೀಡಿದ್ದಾರೆ. ಬಾಲ್ಯದ ಆಟಗಳಾದ ‘ಚೋರ್-ಪೋಲಿಸ್’, ‘ಹೈಡ್‌ ಅಂಡ್ ಸೀಕ್‌’ ಮುಂತಾದವುಗಳಿಗೆ ತಮ್ಮದೇ ಲೀಗ್ ಆರಂಭಿಸುವ ಹಾಸ್ಯಮಯ ಪ್ರಸ್ತಾಪ ಮಾಡಿದ್ದಾರೆ.
ಸಮಾರಂಭದಲ್ಲಿ ಮಾತನಾಡಿದ ಸಲ್ಮಾನ್ ಖಾನ್, “ಗೋಟಿ ಲೀಗ್, ಗಿಲ್ಲಿ–ದಂಡಾ ಲೀಗ್, ಚೈನ್‌ ಕುಕ್‌, ಹೈಡ್‌ ಅಂಡ್ ಸೀಕ್‌, ಚೋರ್–ಪೋಲಿಸ್ ಎಲ್ಲಕ್ಕೂ ಲೀಗ್ ಮಾಡಬೇಕು ಅನ್ನಿಸುತ್ತಿದೆ. ವಿದ್ಯಾವಂತರಿಗಾಗಿ ‘ಡಾಕ್ಟರ್–ಡಾಕ್ಟರ್’ ಲೀಗ್ ಕೂಡ ಮಾಡಬಹುದು” ಎಂದರು.
ಸಲ್ಮಾನ್ ಆಗಸ್ಟ್ 24ರಂದು ಪ್ರಾರಂಭವಾಗಲಿರುವ ‘ಬಿಗ್‌ ಬಾಸ್‌’ 19ನೇ ಸೀಸನ್‌ಗೆ ನಿರೂಪಕರಾಗಿ ಮರಳಲಿದ್ದಾರೆ. “ಈ ಬಾರಿ ‘ಘರ್ವಾಲೋ ಕಿ ಸರ್ಕಾರ್‌’ ಕಾಂಸೆಪ್ಟ್‌ ಇರುತ್ತದೆ. ಅನೇಕರು ಹಗ್ಗ ಎಳೆಯುವಾಗ ಮನೆಯಲ್ಲಿ ಬಿರುಕುಗಳು, ಜಗಳಗಳು ನಡೆಯುವುದು ಖಚಿತ” ಎಂದು 59 ವರ್ಷದ ಸೂಪರ್‌ಸ್ಟಾರ್‌ ಹೇಳಿದರು.
ಇತ್ತೀಚೆಗೆ ‘ಸಿಕಂದರ್‌’ ಆಕ್ಷನ್-ಡ್ರಾಮಾ ಚಿತ್ರದಲ್ಲಿ ನಟಿಸಿದ ಸಲ್ಮಾನ್ ಖಾನ್, ಶೀಘ್ರದಲ್ಲೇ ಅಪೂರ್ವ ಲಖಿಯಾ ನಿರ್ದೇಶನದ ‘ಬ್ಯಾಟಲ್‌ ಆಫ್‌ ಗಾಲ್ವಾನ್‌’ ಚಿತ್ರದಲ್ಲೂ ಕಾಣಿಸಿಕೊಳ್ಳಲಿದ್ದಾರೆ. ಈ ಸಿನಿಮಾ 2020ರಲ್ಲಿ ಗಾಲ್ವಾನ್‌ ಕಣಿವೆಯಲ್ಲಿ ಭಾರತೀಯ–ಚೀನೀ ಸೈನಿಕರ ನಡುವೆ ನಡೆದ ಘರ್ಷಣೆಯನ್ನು ಆಧರಿಸಿದೆ.
