ವಾಷಿಂಗ್ಟನ್: ಅಮೆರಿಕದ ವಲಸೆ ನೀತಿ ಕುರಿತು ಡೆಮಾಕ್ರಾಟ್ ನಾಯಕರು ತಮ್ಮನ್ನು ಸಂಪರ್ಕಿಸಿದ್ದು, ಮಾತುಕತೆಗೆ ಸಿದ್ಧವಿರುವುದಾಗಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ.
ಹಲವು ವರ್ಷಗಳ ಹಿಂದೆ ಅಕ್ರಮವಾಗಿ ಅಮೆರಿಕ ಪ್ರವೇಶಿಸಿ, ಬಳಿಕ ಉದ್ಯೋಗ ಮಾಡಿಕೊಂಡು ನೆಲೆಸಿರುವವರ ಭವಿಷ್ಯ ಮಾತುಕತೆಯ ಪ್ರಮುಖ ವಿಷಯವಾಗುವ ಸಾಧ್ಯತೆಯಿದೆ. ಕೊಲೆಗಡುಕರು ಮತ್ತು ಮಾದಕವಸ್ತು ಕಳ್ಳಸಾಗಣೆದಾರರಂತಹ ಅಪರಾಧಿಗಳನ್ನು ಗಡಿಪಾರು ಮಾಡುವುದಕ್ಕೆ ಆದ್ಯತೆ ನೀಡಲಾಗುತ್ತಿದೆ. ದೀರ್ಘಕಾಲದಿಂದ ದುಡಿಯುತ್ತಿರುವ ಕಾರ್ಮಿಕರ ವಿಚಾರ ವಿಭಿನ್ನವಾಗಿದೆ ಎಂದು ಟ್ರಂಪ್ ಹೇಳಿದ್ದಾರೆ.

ಆರೋಗ್ಯ ಸೇವೆ ಮತ್ತು ವಲಸೆ ಕುರಿತು ಚರ್ಚಿಸಲು ಡೆಮಾಕ್ರಾಟ್ ನಾಯಕರು ಬಯಸಿದ್ದಾರೆ. ಆರೋಗ್ಯ ಸೇವೆ ವಿಚಾರದಲ್ಲಿ ಒಪ್ಪಂದ ಸುಲಭವಾಗಬಹುದು ಎಂದಿರುವ ಅವರು, ವಲಸೆ ಮಾತುಕತೆಗೆ ಯಾವುದೇ ದಿನಾಂಕ ಅಥವಾ ಷರತ್ತು ಪ್ರಕಟಿಸಿಲ್ಲ.
ಹೌಸ್ ಡೆಮಾಕ್ರಟಿಕ್ ನಾಯಕ ಹಕೀಮ್ ಜೆಫ್ರಿಸ್ ಮತ್ತು ಸೆನೆಟ್ ನಾಯಕ ಚಕ್ ಶುಮರ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ ಟ್ರಂಪ್, ಮುಂದಿನ ಕಾಂಗ್ರೆಸ್ ಕಳುಹಿಸುವ ಮಸೂದೆಗಳಲ್ಲಿ ಬದಲಾವಣೆ ತರಲು ವೀಟೊ ಬೆದರಿಕೆಯನ್ನು ಮಾತುಕತೆಯ ಸಾಧನವಾಗಿ ಬಳಸುವುದಾಗಿ ತಿಳಿಸಿದ್ದಾರೆ.















































































