ನವದೆಹಲಿ: ಭಾರತೀಯ ನೌಕಾಪಡೆಯ ಯುದ್ಧನೌಕೆ ಐಎನ್‌ಎಸ್ ತ್ರಿಶೂಲ್ ತನ್ನ ಮೆಡಿಟರೇನಿಯನ್ ನಿಯೋಜನೆಯ ಭಾಗವಾಗಿ ಗ್ರೀಸ್‌ನ ಸೌಡಾ ಕೊಲ್ಲಿಗೆ ನೀಡಿದ್ದ ಬಂದರು ಭೇಟಿಯನ್ನು ನವೆಂಬರ್ 3ರಂದು ಮುಕ್ತಾಯಗೊಳಿಸಿದೆ. ಈ ವೇಳೆ ಹೆಲೆನಿಕ್ ನೌಕಾಪಡೆಯೊಂದಿಗೆ ವೃತ್ತಿಪರ ಮಾತುಕತೆ ಹಾಗೂ ಜಂಟಿ ಸಮುದ್ರ ಸಮರಾಭ್ಯಾಸ ನಡೆಸುವ ಮೂಲಕ ಉಭಯ ದೇಶಗಳ ನಡುವಿನ ಕಡಲ ಸಹಕಾರವನ್ನು ಬಲಪಡಿಸಿದೆ.
ಭೇಟಿಯ ಸಂದರ್ಭದಲ್ಲಿ ಐಎನ್‌ಎಸ್ ತ್ರಿಶೂಲ್‌ನ ಕಮಾಂಡಿಂಗ್ ಅಧಿಕಾರಿ ಗ್ರೀಸ್‌ನ ಹಿರಿಯ ನೌಕಾಪಡೆ ಅಧಿಕಾರಿಗಳು, ನ್ಯಾಟೋ ಕಡಲ ತಡೆ ಕಾರ್ಯಾಚರಣೆ ತರಬೇತಿ ಕೇಂದ್ರದ ಪ್ರತಿನಿಧಿಗಳು ಹಾಗೂ ಸೌಡಾ ಕೊಲ್ಲಿಯಲ್ಲಿರುವ ಅಮೆರಿಕ ನೌಕಾ ಬೆಂಬಲ ಘಟಕದ ಮುಖ್ಯಸ್ಥರೊಂದಿಗೆ ಚರ್ಚೆ ನಡೆಸಿದರು. ಕಾರ್ಯಾಚರಣೆಯ ಲಾಜಿಸ್ಟಿಕ್ಸ್, ಪರಸ್ಪರ ನೆರವು ಮತ್ತು ನೌಕಾಪಡೆಗಳ ನಡುವಿನ ಸಹಕಾರ ಮಾತುಕತೆಯ ಪ್ರಮುಖ ವಿಷಯಗಳಾಗಿದ್ದವು.
ಗ್ರೀಕ್ ನೌಕಾಪಡೆಯ ಸಿಬ್ಬಂದಿ ಐಎನ್‌ಎಸ್ ತ್ರಿಶೂಲ್‌ಗೆ ಭೇಟಿ ನೀಡಿ ಅದರ ಸಾಮರ್ಥ್ಯಗಳ ಕುರಿತು ಮಾಹಿತಿ ಪಡೆದರು. ಗ್ರೀಸ್‌ನಲ್ಲಿರುವ ಭಾರತದ ರಾಯಭಾರಿ ರವಿಶಂಕರ್ ಕೂಡ ಹಡಗಿಗೆ ಭೇಟಿ ನೀಡಿ ಸಿಬ್ಬಂದಿಯೊಂದಿಗೆ ಸಂವಾದ ನಡೆಸಿದರು. ಈ ಸಂದರ್ಭದಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮವನ್ನೂ ಆಯೋಜಿಸಲಾಗಿತ್ತು.
ಸೌಡಾ ಕೊಲ್ಲಿಯಿಂದ ನಿರ್ಗಮಿಸುವ ವೇಳೆ ಐಎನ್‌ಎಸ್ ತ್ರಿಶೂಲ್, ಹೆಲೆನಿಕ್ ನೌಕಾಪಡೆಯ ಎಚ್‌ಎಸ್ ಲಿಮ್ನೋಸ್ (ಎಫ್ 451) ಹಡಗಿನೊಂದಿಗೆ ಪ್ಯಾಸೇಜ್ ವ್ಯಾಯಾಮ (ಪ್ಯಾಸೆಕ್ಸ್) ನಡೆಸಿತು.
ಈ ಕಸರತ್ತಿನಲ್ಲಿ ಸಂಘಟಿತ ನೌಕಾ ಚಲನೆ, ಮರುಪೂರಣ ಕಾರ್ಯವಿಧಾನಗಳು, ಹೆಲಿಕಾಪ್ಟರ್ ಕ್ರಾಸ್-ಡೆಕ್ ಲ್ಯಾಂಡಿಂಗ್ ಮತ್ತು ಸಂವಹನ ಅಭ್ಯಾಸಗಳು ನಡೆದವು.
