ನವದೆಹಲಿ: ಒಮೆಗಾ–3 ಕೊಬ್ಬಿನಾಮ್ಲಗಳಿಂದ ಸಮೃದ್ಧವಾದ ಆಹಾರವು ಮಕ್ಕಳಲ್ಲಿ ಸಮೀಪದೃಷ್ಟಿ (ಮೈಯೋಪಿಯಾ) ಬೆಳವಣಿಗೆಯನ್ನು ತಡೆಯಲು ಸಹಾಯಕವಾಗಬಹುದು ಎಂದು ಜಾಗತಿಕ ಅಧ್ಯಯನವೊಂದು ಬಹಿರಂಗಪಡಿಸಿದೆ.
ಮೀನಿನ ಎಣ್ಣೆ ಮೊದಲಾದವುಗಳಲ್ಲಿ ಸಿಗುವ ಈ ಒಮೆಗಾ–3 ಬಹುಅಪರ್ಯಾಪ್ತ ಕೊಬ್ಬಿನಾಮ್ಲಗಳು (ω-3 PUFAಗಳು), ಈಗಾಗಲೇ ಒಣ ಕಣ್ಣಿನ ಕಾಯಿಲೆ ಹಾಗೂ ಮ್ಯಾಕ್ಯುಲರ್ ಡಿಜೆನರೇಶನ್ ತಡೆಗಟ್ಟಲು ಪರಿಣಾಮಕಾರಿ ಎಂದು ತಿಳಿದಿದೆ. ಇದೀಗ ಮಕ್ಕಳ ಸಮೀಪದೃಷ್ಟಿ ತಡೆಯುವಲ್ಲಿಯೂ ಸಹ ಅವು ಮಹತ್ವದ್ದಾಗಬಹುದು ಎಂಬುದು ಅಧ್ಯಯನದಿಂದ ಹೊರಬಂದಿದೆ.
“ಹೆಚ್ಚಿನ ω-3 PUFA ಸೇವನೆಯು ಕಡಿಮೆ ಕಣ್ಣಿನ ಅಕ್ಷೀಯ ಉದ್ದ ಮತ್ತು ಕಡಿಮೆ ಸಮೀಪದೃಷ್ಟಿ ವಕ್ರೀಭವನದೊಂದಿಗೆ ಸಂಬಂಧಿಸಿದೆ. ಇದು ಸಮೀಪದೃಷ್ಟಿ ಬೆಳವಣಿಗೆಯ ವಿರುದ್ಧ ಒಮೆಗಾ–3 ಆಹಾರ ಅಂಶಗಳು ರಕ್ಷಣಾತ್ಮಕವಾಗಿರಬಹುದು ಎಂಬುದನ್ನು ತೋರಿಸುತ್ತದೆ” ಎಂದು ಹಾಂಗ್‌ಕಾಂಗ್‌ನ ಚೈನೀಸ್ ಯುನಿವರ್ಸಿಟಿಯ ಪ್ರೊ. ಜೇಸನ್ ಸಿ. ಯಾಮ್ ಹೇಳಿದರು.
ಅಧ್ಯಯನದ ವಿವರ:
- ಚೀನಾದಲ್ಲಿ 6–8 ವರ್ಷದ 1,005 ಮಕ್ಕಳ ಮೇಲೆ ಸಂಶೋಧನೆ ನಡೆಸಲಾಯಿತು.
- ಮಕ್ಕಳ ದೃಷ್ಟಿ ಪರೀಕ್ಷೆ, ಆಹಾರ ಪದ್ಧತಿ ಮತ್ತು ದೈಹಿಕ ಚಟುವಟಿಕೆಗಳನ್ನು ವಿಶ್ಲೇಷಿಸಲಾಯಿತು.
- ಸುಮಾರು 27.5% ಮಕ್ಕಳಿಗೆ ಸಮೀಪದೃಷ್ಟಿ ಕಂಡುಬಂತು.
- ಒಮೆಗಾ–3 ಸೇವನೆ ಹೆಚ್ಚಿನವರಲ್ಲಿ ಅಪಾಯ ಕಡಿಮೆಯಾಗಿದ್ದರೆ, ಸ್ಯಾಚುರೇಟೆಡ್ ಕೊಬ್ಬು (ಬೆಣ್ಣೆ, ತಾಳೆ ಎಣ್ಣೆ, ಕೆಂಪು ಮಾಂಸ) ಹೆಚ್ಚಾಗಿ ತಿನ್ನುವ ಮಕ್ಕಳಲ್ಲಿ ಸಮೀಪದೃಷ್ಟಿಯ ಅಪಾಯ ಹೆಚ್ಚಿತ್ತು.
- ಯಾಮ್ ಅವರ ಪ್ರಕಾರ, ಒಮೆಗಾ–3 ಕೊಬ್ಬಿನಾಮ್ಲಗಳು ಕಣ್ಣಿನ ಕೋರಾಯ್ಡ್ ಪದರದ ಮೂಲಕ ರಕ್ತಪ್ರವಾಹ ಹೆಚ್ಚಿಸಿ, ಕಣ್ಣಿನ ಬಿಳಿಭಾಗದಲ್ಲಿ ಆಮ್ಲಜನಕದ ಕೊರತೆಯನ್ನು ತಡೆದು ಸಮೀಪದೃಷ್ಟಿ ಬೆಳವಣಿಗೆಯನ್ನು ನಿಗ್ರಹಿಸುತ್ತವೆ.
ಈ ಅಧ್ಯಯನವು ಬ್ರಿಟಿಷ್ ಜರ್ನಲ್ ಆಫ್ ಆಪ್ತಾಲ್ಮಾಲಜಿಯಲ್ಲಿ ಪ್ರಕಟಗೊಂಡಿದ್ದು, ಕಾರಣ–ಕಾರ್ಯ ಸಂಬಂಧವನ್ನು ದೃಢೀಕರಿಸಲು ಇನ್ನಷ್ಟು ದೀರ್ಘಕಾಲದ ಅಧ್ಯಯನಗಳು ಅಗತ್ಯವಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
