ಹೈದರಾಬಾದ್: ಇದು ನಿಜಕ್ಕೂ ಬೆಚ್ಚಿಬೀಳಿಸುವಂತಹಾ ಸಂಗತಿ. ವ್ಯವಸ್ಥೆಗೆ ಹಿಡಿದ ಕನ್ನಡಿ ಎಂದೂ ಹೇಳಬಹುದು.
ವ್ಯಕ್ತಿಯೊಬ್ಬ ತನ್ನ ಅಜ್ಜನ ಶವವನ್ನು ಮೂರು ದಿನಗಳ ಕಾಲ ಫ್ರಿಜ್‌ನಲ್ಲಿಟ್ಟು ಸ್ಥಳೀಯರನ್ನು ಬೆಚ್ಚಿ ಬೀಳಿಸಿದ್ದಾನೆ. ಈ ಬಗ್ಗೆ ಮಾಹಿತಿ ಪಡೆದ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದಾಗ ಶವವೊಂದು ಫ್ರಿಜ್‌ನಲ್ಲಿ ಪತ್ತೆಯಾಗಿದೆ.
ಈ ಪ್ರಸಂಗ ನಡೆದದ್ದು ತೆಲಂಗಾಣದಲ್ಲಿ. ಇದೇನೂ ಕ್ರೈಂ ಅಲ್ಲ, 93 ವರ್ಷ ಪ್ರಾಯದ ಅಜ್ಜ ಕೊಲೆಯಾಗಿದ್ದೂ ಅಲ್ಲ, ಅನಾರೋಗ್ಯದಿಂದ ಬಳಲಿ ಕೊನೆಯುಸಿರೆಳೆದಿದ್ದಾರೆ. ಆದರೂ ಆತನ ಮೊಮ್ಮಗ ನಿಖಿಲ್ ಎಂಬಾತ ಈ ಶವವನ್ನು ಫ್ರಿಜ್‌ನಲ್ಲಿಟ್ಟಿದ್ದ ಎಂಬ ಬಗ್ಗೆ ಪೊಲೀಸರು ವಿಚಾರಿಸಿದಾಗ ಇಡೀ ನಾಗರಿಕ ಸಮಾಜವೇ ತಲೆತಗ್ಗಿಸುವಂತ ಸಂಗತಿ ಬೆಳಕಿಗೆ ಬಂದಿದೆ.
ಅಜ್ಜ, ನಿವೃತ್ತಿ ನಂತರ ಪೆನ್ಶನ್ ಹಣದಲ್ಲಿ ಮೊಮ್ಮಗನೊಂದಿಗೆ ಬಾಡಿಗೆ ಮನೆಯಲ್ಲಿ ವಾಸವಿದ್ದರು. ಇದ್ದಕ್ಕಿದ್ದಂತೆ ಅಜ್ಜ ಅನಾರೋಗ್ಯಕ್ಕೊಳಗಾಗಿ ಮೃತಪಟ್ಟಿದ್ದಾರೆ. ಶವ ಸಂಸ್ಕಾರ ಮಾಡಲು ಆತನ ಕೈಯಲ್ಲಿ ಹಣವಿರಲಿಲ್ಲ. ಬೇರೆಯವರಲ್ಲಿ ಡುಡ್ಡು ಕೇಳಿದರೆ ಸಿಗಲಿಲ್ಲ. ಈ ವ್ಯವಸ್ಥೆಯಿಂದ ದಂಗಾದ ಈ ಮೊಮ್ಮಗ ತನ್ನ ಅಜ್ಜನ ಶವವನ್ನು ರೆಫ್ರಿಜರೇಟರ್‌ನಲ್ಲಿ ಬಚ್ಚಿಟ್ಟಿದ್ದ.
ವಾರಂಗಲ್ ನ ಪರ್ಕಾಲಾ ಎಂಬಲ್ಲಿ ಕೆಟ್ಟ ವಾಸನೆ ಬರುತ್ತಿರುವುದಾಗಿ ಸ್ಥಳೀಯರು ಪೊಲೀಸರಿಗೆ ದೂರು ನೀಡಿದ್ದರು. ಈ ವಾಸನೆಯ ಬಗ್ಗೆ ತಲೆಕೆಡಿಸಿಕೊಂಡ ಪೊಲೀಸರು ಅದರ ಮೂಲ ಹುಡುಕುತ್ತಾ ಹೋದಾಗ ಫ್ರಿಜ್‌ನಲ್ಲಿ ಶವ ಇರುವುದು ಗೊತ್ತಾಗಿದೆ. ಬಳಿಕ ಪೊಲೀಸರ ನೆರವಿನಲ್ಲಿ ಮುಂದಿನ ಕ್ರಮ ನಡೆದಿದೆ.
