ನವದೆಹಲಿ: 2022–23 ಅನ್ನು ಮೂಲ ವರ್ಷವಾಗಿಟ್ಟುಕೊಂಡು ಜಿಡಿಪಿ ಅಂದಾಜುಗಳಿಗಾಗಿ ತಯಾರಾಗುತ್ತಿರುವ ಹೊಸ ಸರಣಿಯಲ್ಲಿ ಜಿಎಸ್ಟಿ ದತ್ತಾಂಶದ ಬಳಕೆಯನ್ನು ಹೆಚ್ಚಿಸಲು ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ (MoSPI) ರಚಿಸಿದ ಉಪಸಮಿತಿ ಶಿಫಾರಸು ಮಾಡಿದೆ.
ಮಂಗಳವಾರ ಬಿಡುಗಡೆಯಾದ ಹೊಸ ದತ್ತಾಂಶ ಮೂಲಗಳು, ದರಗಳು ಮತ್ತು ಅನುಪಾತಗಳ ಸಂಯೋಜನೆ ಕುರಿತ ಉಪಸಮಿತಿಯ ವರದಿ, ರಾಷ್ಟ್ರೀಯ ಖಾತೆಗಳ ಮೂಲ ವರ್ಷವನ್ನು 2022–23 ಹಣಕಾಸು ವರ್ಷಕ್ಕೆ ಪರಿಷ್ಕರಿಸುವ ಪ್ರಕ್ರಿಯೆಯ ಭಾಗವಾಗಿದೆ. ಹೊಸ ಸರಣಿ (ಆಧಾರ: 2022–23) ಫೆಬ್ರವರಿ 27, 2026 ರಂದು ಬಿಡುಗಡೆ ಆಗಲಿದೆ ಎಂದು ಸಚಿವಾಲಯ ತಿಳಿಸಿದೆ.
ರಾಷ್ಟ್ರೀಯ ಖಾತೆಗಳ ಹೊಸ ಸರಣಿಯಲ್ಲಿ ಮಾಡಲಾಗುತ್ತಿರುವ ಬದಲಾವಣೆಗಳ ಬಗ್ಗೆ ಬಳಕೆದಾರರಿಗೆ ತಿಳಿಸಲು ಐದು ಉಪಸಮಿತಿಗಳ ವರದಿಗಳನ್ನು ಕ್ರಮವಾಗಿ ಬಿಡುಗಡೆ ಮಾಡಲಾಗುತ್ತಿದೆ. ಹೊಸ ದತ್ತಾಂಶ ಮೂಲಗಳ ಸಂಯೋಜನೆಗಾಗಿ ರಚಿಸಲಾದ ಉಪಸಮಿತಿಗೆ GST Network (GSTN) ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಮನೀಶ್ ಸಿನ್ಹಾ ನೇತೃತ್ವ ವಹಿಸಿದ್ದರು. ಸಮಿತಿಯಲ್ಲಿ ಶೈಕ್ಷಣಿಕರು, ಸಂಶೋಧಕರು, ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಪ್ರತಿನಿಧಿಗಳು ಹಾಗೂ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಅಧಿಕಾರಿಗಳು ಭಾಗವಹಿಸಿದ್ದರು.
ಉಪಸಮಿತಿಯ ಪ್ರಕಾರ, ಜಿಎಸ್ಟಿ ದತ್ತಾಂಶವು ಹೆಚ್ಚಿನ ಆವರ್ತನದ, ಉತ್ಪನ್ನ ಕೋಡ್ ಮತ್ತು ಪ್ರಾದೇಶಿಕ ಗುರುತುಗಳನ್ನು ಒಳಗೊಂಡ ಆಡಳಿತಾತ್ಮಕ ದತ್ತಾಂಶವಾಗಿರುವುದರಿಂದ, ರಾಷ್ಟ್ರೀಯ ಖಾತೆಗಳ ಒಟ್ಟು ಮೊತ್ತಗಳ ಸಂಕಲನ ಮತ್ತು ದೃಢೀಕರಣಕ್ಕೆ ಪ್ರಮುಖ ಮೂಲವಾಗಲಿದೆ.
2011–12 ಸರಣಿಯಲ್ಲಿ ತ್ರೈಮಾಸಿಕ ಹಾಗೂ ವಾರ್ಷಿಕ ರಾಷ್ಟ್ರೀಯ ಖಾತೆಗಳ ಕೆಲವು ವಲಯಗಳಲ್ಲಿ ಜಿಎಸ್ಟಿ ದತ್ತಾಂಶ ಬಳಸಲಾಗುತ್ತಿತ್ತು. ಆದರೆ ಹೊಸ ಸರಣಿಯಲ್ಲಿ, ಹಿಂದಿನಂತೆ ಸೂಚಕಗಳ ಅವಲಂಬನೆಯಿಗಿಂತ ಹೆಚ್ಚಾಗಿ, ಖಾಸಗಿ ನಿಗಮಗಳಿಂದ ಒಟ್ಟು ರಾಜ್ಯ ದೇಶೀಯ ಉತ್ಪನ್ನಕ್ಕೆ (GSDP) ನೀಡುವ GVA ಕೊಡುಗೆಯನ್ನು ಜಿಎಸ್ಟಿ ದತ್ತಾಂಶದ ಆಧಾರದಲ್ಲಿ ಹೆಚ್ಚು ನಿಖರವಾಗಿ ಅಂದಾಜಿಸಲಾಗುತ್ತದೆ ಎಂದು ವರದಿ ತಿಳಿಸಿದೆ. ಸಕ್ರಿಯ ಖಾಸಗಿ ನಿಗಮಗಳನ್ನು ಗುರುತಿಸುವ ಮೂಲಕ ವರದಿ ಮಾಡದ ಕಂಪನಿಗಳ GVA ಇಂಪ್ಯೂಟೇಶನ್ ನಿಖರತೆ ಸುಧಾರಿಸಲಿದೆ ಎಂದು ಹೇಳಲಾಗಿದೆ.
MoSPI 2021–22ರಿಂದ ವಾರ್ಷಿಕವಾಗಿ ASUSE ಮತ್ತು 2017–18ರಿಂದ PLFS ಸಮೀಕ್ಷೆಗಳನ್ನು ನಡೆಸುತ್ತಿದೆ. ಸಂಘಟಿತವಲ್ಲದ ವಲಯದ ಮೌಲ್ಯವರ್ಧನೆ ಮತ್ತು ಉತ್ಪಾದನೆಗೆ ಸಂಬಂಧಿಸಿದ ದೃಢ ದತ್ತಾಂಶದ ನಿಯಮಿತ ಲಭ್ಯತೆ ಹಿನ್ನೆಲೆಯಲ್ಲಿ, ಗೃಹ ವಲಯ ಮತ್ತು ಅರೆ-ನಿಗಮಗಳ GVA ಅಂದಾಜುಗಳನ್ನು ಈಗ ASUSE ಮತ್ತು PLFS ಫಲಿತಾಂಶಗಳ ಆಧಾರದ ಮೇಲೆ ಸಂಕಲಿಸಲಾಗುತ್ತದೆ. ಇದರಿಂದ 2011–12 ಸರಣಿಯಲ್ಲಿ ಅನುಸರಿಸಿದ ಸೂಚಕಾಧಾರಿತ ಮೂಲ ವರ್ಷದ ಅಂದಾಜುಗಳ ಅವಲಂಬನೆ ಕಡಿಮೆಯಾಗಿದ್ದು, ಅಂದಾಜುಗಳ ನಿಖರತೆ ಮತ್ತು ದೃಢತೆ ಹೆಚ್ಚಲಿದೆ ಎಂದು ಅಧಿಕೃತ ಹೇಳಿಕೆ ತಿಳಿಸಿದೆ.
ರಾಜ್ಯಗಳಿಂದ ಸ್ಥಳೀಯ ಸಂಸ್ಥೆಗಳು ಮತ್ತು ರಾಜ್ಯ ಸ್ವಾಯತ್ತ ಸಂಸ್ಥೆಗಳ ಮಾಹಿತಿಯ ವರದಿ ವ್ಯವಸ್ಥೆಯನ್ನೂ ಬಲಪಡಿಸಲಾಗಿದೆ. ಇದರಿಂದ ನೇರ ಅಂದಾಜುಗಳ ಪಾಲು ಹೆಚ್ಚಲಿದೆ.
ಈ ವರದಿ 2011–12ರ ರಾಷ್ಟ್ರೀಯ ಖಾತೆಗಳ ಸರಣಿಯಲ್ಲಿ ಬಳಸಲಾದ ದತ್ತಾಂಶ ಮೂಲಗಳ ವಿಮರ್ಶೆ ಜೊತೆಗೆ, ಹೊಸ ಆಡಳಿತಾತ್ಮಕ ಮತ್ತು ಸಮೀಕ್ಷಾ ದತ್ತಾಂಶ ಮೂಲಗಳ ಬಳಕೆಯನ್ನು ವಿವರಿಸುತ್ತದೆ. ಉತ್ಪಾದನೆ ಮತ್ತು ವೆಚ್ಚ-ಭಾಗದ ಸಮುಚ್ಚಯಗಳ ಸಂಕಲನದಲ್ಲಿ ಬಳಸುವ ಅಧ್ಯಯನಗಳು ಹಾಗೂ ವಿವಿಧ ಸಭೆಗಳಲ್ಲಿ ಚರ್ಚಿಸಲಾದ ಪ್ರಮುಖ ವಿಷಯಗಳು ಮತ್ತು ಶಿಫಾರಸುಗಳನ್ನು ವರದಿ ಒಳಗೊಂಡಿದೆ.
ರಾಷ್ಟ್ರೀಯ ಖಾತೆಗಳ ಮೂಲ ವರ್ಷ ಪರಿಷ್ಕರಣೆಗಾಗಿ MoSPI, ಪ್ರೊ. ಬಿ.ಎನ್. ಗೋಲ್ಡರ್ ಅಧ್ಯಕ್ಷತೆಯಲ್ಲಿ ರಾಷ್ಟ್ರೀಯ ಖಾತೆ ಅಂಕಿಅಂಶಗಳ ಸಲಹಾ ಸಮಿತಿ (ACNAS) ರಚಿಸಿತ್ತು. ಸಮಿತಿಯು 2022–23 ಅನ್ನು ಹೊಸ ಮೂಲ ವರ್ಷವಾಗಿ ನಿಗದಿ ಮಾಡಿ, ವಿವಿಧ ವಿಷಯಗಳ ಕುರಿತಾಗಿ ಐದು ಉಪಸಮಿತಿಗಳನ್ನು ರಚಿಸಿತು.
ವಿಧಾನಶಾಸ್ತ್ರೀಯ ಸುಧಾರಣೆಗಳ ಕುರಿತ ಉಪಸಮಿತಿಯ ವರದಿ ಫೆಬ್ರವರಿ 18, 2026ರಂದು ಹಾಗೂ ಸ್ಥಿರ ಬೆಲೆ ಅಂದಾಜುಗಳ ಕುರಿತ ವರದಿ ಫೆಬ್ರವರಿ 20, 2026ರಂದು ಈಗಾಗಲೇ ಬಿಡುಗಡೆಗೊಂಡಿವೆ.
