ಕೊಚ್ಚಿ: ಕಂದಾಯ ಗುಪ್ತಚರ ನಿರ್ದೇಶನಾಲಯ (ಡಿಆರ್ಐ) ನಡೆಸಿದ ‘ಆಪರೇಷನ್ ಚಕ್ರವ್ಯೂಹ’ ಕಾರ್ಯಾಚರಣೆಯಲ್ಲಿ ಕೇರಳದ ವಿವಿಧ ಭಾಗಗಳಲ್ಲಿ 24 ಕೆಜಿಗೂ ಅಧಿಕ ಮಾದಕ ಮತ್ತು ಸೈಕೋಟ್ರೋಪಿಕ್ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಐವರನ್ನು ಬಂಧಿಸಲಾಗಿದೆ.
ಡಿಆರ್ಐನ ಕೊಚ್ಚಿನ್ ಘಟಕವು ಕೊಚ್ಚಿ, ಮಲಪ್ಪುರಂ ಮತ್ತು ತಿರುವನಂತಪುರಂನಲ್ಲಿ ನಡೆಸಿದ ದಾಳಿಗಳ ವೇಳೆ ಮೆಥಾಕ್ವಾಲೋನ್, ಮೆಥಾಂಫೆಟಮೈನ್ ಹಾಗೂ ಹ್ಯಾಶಿಶ್ ಎಣ್ಣೆ ಸೇರಿದಂತೆ ನಿಷೇಧಿತ ಮಾದಕ ವಸ್ತುಗಳನ್ನು ಪತ್ತೆಹಚ್ಚಿದೆ. ಇವುಗಳನ್ನು ಅಕ್ರಮ ವಿತರಣೆ ಮತ್ತು ಕಳ್ಳಸಾಗಣೆಗೆ ಬಳಸಲಾಗುತ್ತಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಮಾದಕ ವಸ್ತುಗಳನ್ನು ವಿಮಾನ ನಿಲ್ದಾಣಗಳ ಮೂಲಕ ಪ್ರಯಾಣಿಕರ ಸಾಮಾನು, ಕೊರಿಯರ್ ಪಾರ್ಸೆಲ್ ಹಾಗೂ ರಫ್ತು ಸರಕುಗಳಲ್ಲಿ ಅಡಗಿಸಿ ಸಾಗಿಸಲಾಗುತ್ತಿತ್ತು. ಈ ಜಾಲಕ್ಕೆ ಸಂಬಂಧಿಸಿದ ಐವರನ್ನು ಎನ್ಡಿಪಿಎಸ್ ಕಾಯ್ದೆಯಡಿ ಬಂಧಿಸಲಾಗಿದೆ.
ಸಂಘಟಿತ ಮಾದಕ ವಸ್ತುಗಳ ಕಳ್ಳಸಾಗಣೆ ಜಾಲಗಳನ್ನು ಭೇದಿಸಲು ಡಿಆರ್ಐ ನಿರಂತರ ಕಾರ್ಯಾಚರಣೆ ನಡೆಸುತ್ತಿದ್ದು, ದೇಶೀಯ ಹಾಗೂ ಅಂತರರಾಷ್ಟ್ರೀಯ ಮಾರ್ಗಗಳಲ್ಲಿ ಸಕ್ರಿಯವಾಗಿದ್ದ ಜಾಲಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
DRI intensifies anti-narcotics drive in Kerala under Operation Chakravyuh, 24 kg narcotic contraband seized, 5 arrested
🔶The contraband was detected in different modes of smuggling, including passenger baggage at Airport, concealment in courier consignment and outbound export… pic.twitter.com/qp6nRRldp8
— PIB India (@PIB_India) May 30, 2026
ಹಿಂದಿನ ಹಣಕಾಸು ವರ್ಷದಲ್ಲಿ ಡಿಆರ್ಐನ ಕೊಚ್ಚಿನ್ ವಲಯ ಘಟಕವು ಕೇರಳದಲ್ಲಿ ಸುಮಾರು ₹70.76 ಕೋಟಿ ಮೌಲ್ಯದ ಮಾದಕ ವಸ್ತುಗಳನ್ನು ವಶಪಡಿಸಿಕೊಂಡಿದ್ದು, ವಿವಿಧ ಪ್ರಕರಣಗಳಲ್ಲಿ 21 ಮಂದಿಯನ್ನು ಬಂಧಿಸಿತ್ತು.
ಮಾದಕ ವಸ್ತುಗಳ ಕಳ್ಳಸಾಗಣೆ ವಿರುದ್ಧ ಕಠಿಣ ಕ್ರಮ ಮುಂದುವರಿಯಲಿದ್ದು, ‘ನಶಾ ಮುಕ್ತ ಭಾರತ’ ಗುರಿ ಸಾಧನೆಗೆ ಬದ್ಧವಾಗಿರುವುದಾಗಿ ಡಿಆರ್ಐ ತಿಳಿಸಿದೆ.
