ವಾಷಿಂಗ್ಟನ್: ಅಮೆರಿಕದ ರಾಜಧಾನಿ ವಾಷಿಂಗ್ಟನ್ ಡಿಸಿ ಮೇಯರ್ ಚುನಾವಣೆಯಲ್ಲಿ ಭಾರತ ಮೂಲದ ರಿನಿ ಸಂಪತ್ ಸ್ಪರ್ಧೆಗೆ ಇಳಿದಿದ್ದು, ದಕ್ಷಿಣ ಏಷ್ಯಾದ ಮೂಲದ ಅಭ್ಯರ್ಥಿಯಾಗಿ ಮತಪತ್ರದಲ್ಲಿ ಸ್ಥಾನ ಪಡೆದ ಮೊದಲ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ತಮಿಳುನಾಡಿನ ಥೇನಿನಲ್ಲಿ ಜನಿಸಿದ ರಿನಿ ಸಂಪತ್, ಏಳನೇ ವಯಸ್ಸಿನಲ್ಲಿ ಅಮೆರಿಕಕ್ಕೆ ತೆರಳಿದ್ದು, ಇದೀಗ ವಾಷಿಂಗ್ಟನ್ ಡಿಸಿ ರಾಜಕೀಯದಲ್ಲಿ ಹೊಸ ಅಧ್ಯಾಯ ಬರೆಯುತ್ತಿದ್ದಾರೆ.
“ಡಿಸಿ ಮೇಯರ್ ಚುನಾವಣೆಗೆ ಮತಪತ್ರದಲ್ಲಿ ಸ್ಥಾನ ಪಡೆದಿರುವುದು ನನಗೆ ಮಾತ್ರವಲ್ಲ, ದಕ್ಷಿಣ ಏಷ್ಯಾ ಸಮುದಾಯಕ್ಕೂ ಮಹತ್ವದ್ದಾಗಿದೆ. ಅಮೆರಿಕನ್ ಡ್ರೀಮ್ ಎಲ್ಲರಿಗೂ ಸಿಗಬೇಕು,” ಎಂದು ಸಂಪತ್ ತಿಳಿಸಿದ್ದಾರೆ.
ಅವರ ಅಭ್ಯರ್ಥಿತ್ವಕ್ಕೆ 4,500 ಕ್ಕೂ ಹೆಚ್ಚು ಮಂದಿ ಸಹಿ ಹಾಕಿದ್ದು, ಅಧಿಕೃತವಾಗಿ ಸ್ಪರ್ಧೆಗೆ ಅರ್ಹತೆ ಪಡೆದಿದ್ದಾರೆ. 31 ವರ್ಷದ ಸರ್ಕಾರಿ ಗುತ್ತಿಗೆದಾರರಾಗಿರುವ ಸಂಪತ್, ಕಳೆದ ಒಂದು ದಶಕದಿಂದ ಡಿಸಿಯಲ್ಲಿ ವಾಸಿಸುತ್ತಿದ್ದಾರೆ.
ಅಭಿಯಾನದಲ್ಲಿ ಮೂಲಭೂತ ನಾಗರಿಕ ಸೇವೆಗಳ ಸುಧಾರಣೆ, ಆಡಳಿತ ದಕ್ಷತೆ ಹೆಚ್ಚಿಸುವುದು ಹಾಗೂ ಜನಜೀವನ ವೆಚ್ಚ ಕಡಿತಗೊಳಿಸುವುದನ್ನು ಪ್ರಮುಖ ಅಜೆಂಡಾಗಾಗಿ ಮುಂದಿಟ್ಟಿದ್ದಾರೆ. ರಸ್ತೆ ಗುಂಡಿಗಳನ್ನು ಸರಿಪಡಿಸುವುದು, ನೀರಿನ ಸೋರಿಕೆ ಸಮಸ್ಯೆ ತಡೆಯುವುದು, 911 ತುರ್ತು ಸೇವೆಯ ಪ್ರತಿಕ್ರಿಯಾ ಸಮಯವನ್ನು ಸುಧಾರಿಸುವುದು ಸೇರಿದಂತೆ ಹಲವು ಭರವಸೆಗಳನ್ನು ನೀಡಿದ್ದಾರೆ.
“ನಾನು ರಾಜಕಾರಣಿಯಲ್ಲ, ಆಡಳಿತ ವ್ಯವಸ್ಥೆಯನ್ನು ಸುಧಾರಿಸಲು ಕೆಲಸ ಮಾಡಿದ ವ್ಯಕ್ತಿ. ನಗರ ಸೇವೆಗಳು ಸರಿಯಾಗಿ ಕಾರ್ಯನಿರ್ವಹಿಸಬೇಕು,” ಎಂದು ಸಂಪತ್ ತಮ್ಮನ್ನು ‘ಔಟ್ಸೈಡರ್’ ಅಭ್ಯರ್ಥಿಯಾಗಿ ಪ್ರಸ್ತುತಪಡಿಸಿದ್ದಾರೆ.
ವಾಷಿಂಗ್ಟನ್ ಡಿಸಿ ಮೇಯರ್-ಕೌನ್ಸಿಲ್ ವ್ಯವಸ್ಥೆಯಡಿಯಲ್ಲಿ ಕಾರ್ಯನಿರ್ವಹಿಸುವುದರಿಂದ, ಈ ಚುನಾವಣೆಯಲ್ಲಿ ಡೆಮಾಕ್ರಟಿಕ್ ಪ್ರಾಥಮಿಕವೇ ಬಹುಮುಖ್ಯವಾಗಿರಲಿದೆ.
ಇತ್ತೀಚಿನ ವರ್ಷಗಳಲ್ಲಿ ಅಮೆರಿಕ ರಾಜಕೀಯದಲ್ಲಿ ಭಾರತೀಯರು ಮತ್ತು ದಕ್ಷಿಣ ಏಷ್ಯಾ ಸಮುದಾಯದ ಭಾಗವಹಿಸುವಿಕೆ ಹೆಚ್ಚುತ್ತಿರುವ ಹಿನ್ನೆಲೆ, ಸಂಪತ್ ಅವರ ಸ್ಪರ್ಧೆ ಕುತೂಹಲ ಮೂಡಿಸಿದೆ.
