ಚೆನ್ನೈ: ಪ್ರತಿವರ್ಷ ಲಕ್ಷಾಂತರ ಭಕ್ತರನ್ನು ಸೆಳೆಯುವ ತಿರುವಣ್ಣಾಮಲೈ ಕಾರ್ತಿಗೈ ದೀಪಂ ಉತ್ಸವಕ್ಕೆ ಈ ಬಾರಿ ಜಿಲ್ಲೆಯು ದಾಖಲೆಯ ಮಟ್ಟದಲ್ಲಿ ಭದ್ರತಾ ಹಾಗೂ ವ್ಯವಸ್ಥಾಪನಾ ಕ್ರಮ ಕೈಗೊಳ್ಳಲಾಗಿದೆ. ನವೆಂಬರ್ 24ರಿಂದ ಪ್ರಾರಂಭವಾದ ಉತ್ಸವ ಡಿಸೆಂಬರ್ 3ರಂದು ನಡೆಯುವ ಮಹಾ ದೀಪಂನೊಂದಿಗೆ ಪರಮೋತ್ಸಾಹಕ್ಕೆ ತಲುಪಲಿದೆ.
ಮಹಾ ದೀಪಂ ದಿನ ಭಕ್ತರ ಪ್ರವಾಹ ಹೆಚ್ಚುವ ನಿರೀಕ್ಷೆಯ ಹಿನ್ನೆಲೆ, ಪಟ್ಟಣದಾದ್ಯಂತ 15,000 ಕ್ಕೂ ಹೆಚ್ಚು ಪೊಲೀಸ್ ಸಿಬ್ಬಂದಿ ನಿಯೋಜನೆ ಮಾಡಲಾಗುತ್ತಿದೆ. ಪ್ರಮುಖ ಸ್ಥಳಗಳಲ್ಲಿ 24 ಕಾವಲು ಗೋಪುರಗಳನ್ನು ಸ್ಥಾಪಿಸಲಾಗಿದ್ದು, ಜನಸಂದಣಿಯನ್ನು ನಿಯಂತ್ರಿಸಲು ವಿಶೇಷ ಘಟಕಗಳು ಕಾರ್ಯನಿರ್ವಹಿಸಲಿವೆ.
#WATCH | Tamil Nadu | A large number of devotees participate in the procession of Lord Annamalaiyar chariot on the seventh day of the Karthigai Deepam festival celebrations in Tiruvannamalai pic.twitter.com/7crhGKznmP
— ANI (@ANI) November 30, 2025
ಜಿಲ್ಲಾಧಿಕಾರಿ ಕೆ. ತಾರ್ಪಗರಾಜ್ ಹಾಗೂ ಪೊಲೀಸ್ ವರಿಷ್ಠಾಧಿಕಾರಿ ಎಂ. ಸುಧಾಕರ್ ಅವರು ಅರುಣಾಚಲೇಶ್ವರ ದೇವಾಲಯ ಹಾಗೂ 14 ಕಿ.ಮೀ ಗಿರಿವಾಳ ಮಾರ್ಗದ ನಾಗರಿಕ ಸೌಲಭ್ಯಗಳನ್ನು ಪರಿಶೀಲಿಸಿ ಸಿದ್ಧತೆಗಳನ್ನು ತಯಾರು ಮಾಡಿಕೊಂಡಿದ್ದಾರೆ. ನವೆಂಬರ್ 30ರಂದು ನಡೆದ ರಥೋತ್ಸವದಲ್ಲಿ ಆರು ಲಕ್ಷಕ್ಕೂ ಹೆಚ್ಚು ಭಕ್ತರು ಪಾಲ್ಗೊಂಡಿದ್ದು, ಡಿಸೆಂಬರ್ 3ರಂದು ಭಕ್ತರ ಸಂಖ್ಯೆ 40–45 ಲಕ್ಷ ತಲುಪಬಹುದು ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.
ಪಟ್ಟಣದಲ್ಲಿ 1,060 ಸಿಸಿಟಿವಿ ಕ್ಯಾಮೆರಾಗಳು, ದೇವಾಲಯ ಆವರಣದಲ್ಲಿ ಮಾತ್ರ 303 ಕ್ಯಾಮೆರಾಗಳು ಅಳವಡಿಸಲಾಗಿದೆ. 26 ದುರ್ಬಲ ಪಾಯಿಂಟ್ಗಳನ್ನು ಗುರುತಿಸಿ, ಹೆಚ್ಚುವರಿ ಪೊಲೀಸ್ ಗಸ್ತು ಹಾಗೂ ಕಾವಲು ಗೋಪುರಗಳನ್ನು ನಿರ್ಮಿಸಲಾಗಿದೆ. ಪಟ್ಟಣದ ಹೊರವಲಯದಲ್ಲಿ 24 ತಾತ್ಕಾಲಿಕ ಬಸ್ ನಿಲ್ದಾಣಗಳು ಕಾರ್ಯನಿರ್ವಹಿಸಲಿದ್ದು, ಒಟ್ಟು 2,325 ಬಸ್ಗಳು ನಿಲ್ಲುವ ಸಾಮರ್ಥ್ಯವಿದೆ. ಡಿಸೆಂಬರ್ 3 ಮತ್ತು 4ರಂದು 4,764 ವಿಶೇಷ ಬಸ್ಗಳು—11,293 ಟ್ರಿಪ್ಗಳೊಂದಿಗೆ—ವಿವಿಧ ಜಿಲ್ಲೆಗಳಿಂದ ಭಕ್ತರನ್ನು ತರಲಿವೆ.
ಮಹಾ ದೀಪಂ ದಿನ ಖಾಸಗಿ ವಾಹನಗಳಿಗೆ ಪಟ್ಟಣ ಪ್ರವೇಶ ನಿಷೇಧವಾಗಿದ್ದು, 180 ಶಟಲ್ ಬಸ್ಗಳು ಪ್ರತಿ ವ್ಯಕ್ತಿಗೆ 10ರೂ. ದರದಲ್ಲಿ ಗಿರಿವಾಳ ಮಾರ್ಗ ಹಾಗೂ ದೇವಾಲಯಕ್ಕೆ ಸಂಪರ್ಕ ಕಲ್ಪಿಸಲಿವೆ. ಪಟ್ಟಣದ ಹೊರವಲಯದಲ್ಲಿ 19,815 ಕಾರುಗಳಿಗೆ ತಾತ್ಕಾಲಿಕ ಪಾರ್ಕಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದೆ.
ಉತ್ಸವದ ಶೃಂಗಾರ: ಮಹಾ ದೀಪ, ತೆಪ್ಪೋತ್ಸವ
ಡಿಸೆಂಬರ್ 3ರಂದು 2,668 ಅಡಿ ಎತ್ತರದ ಅರುಣಾಚಲ ಬೆಟ್ಟದ ಮೇಲೆ ಮಹಾ ದೀಪ ಬೆಳಗುವ ಕ್ಷಣ ಉತ್ಸವದ ಅತ್ಯಂತ ಪವಿತ್ರ ಘಟ್ಟ. ಅದಾದ ಬಳಿಕ ಮುಂದಿನ ಮೂರು ದಿನಗಳು ತೆಪ್ಪ ತಿರುವಿಳ (ತೇಲುವ ಉತ್ಸವ) ಭಕ್ತರಿಗೆ ದೈವಿಕ ಅನುಭವ ನೀಡಲಿದೆ.
