ವಿಮಾನಕ್ಕೆ ಹಕ್ಕಿ ಡಿಕ್ಕಿ; ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕೆಲಕಾಲ ಆತಂಕ

ಮಂಗಳೂರು: ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಭಾರೀ ಅನಾಹುತವೊಂದು ಸ್ವಲ್ಪದರಲ್ಲೇ ತಪ್ಪಿದೆ.

ಇಂದು ಬೆಳಿಗ್ಗೆ ಪ್ರಯಾಣಿಕರನ್ನು ಹೊತ್ತೊಯ್ದ ವಿಮಾನಕ್ಕೆ ಟೇಕಾಫ್ ಆಗುವ ಹಂತದಲ್ಲಿ ದೈತ್ಯ ಹಕ್ಕಿಯೊಂದು ಬಡಿದಿದೆ. ಇಂಡಿಗೋ ವಿಮಾನದ ರೆಕ್ಕೆಗೆ ಹಕ್ಕಿ ಅಪ್ಪಳಿಸಿದ್ದರಿಂದ ಪೈಲೆಟ್ ಗೊಂದಲಕ್ಕೀಡಾದರು. ಕೂಡಲೇ ವಿಮಾನ ರನ್‌ವೇನಿಂದ ವಾಪಾಸಾಗಿದೆ.

ಬೆಳಿಗ್ಗೆ 8.30ರ ಸುಮಾರಿಗೆ ಇಂಡಿಗೋ ವಿಮಾನ ದುಬೈಗೆ ಹಾರಲು ಸಜ್ಜಾಗಿತ್ತು. ರನ್‌ವೇ ಮೂಲಕ ಸಾಗಿ, ಇನ್ನೇನು ಟೇಕಾಫ್ ಆಗಬೇಕೆನ್ನುವಷ್ಟರಲ್ಲಿ ಈ ಘಟನೆ ನಡೆದಿದೆ. ಇದರಿಂದಾಗಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕೆಲಕಾಲ ಗೊಂದಲದ ವಾತಾವರ ನಿರ್ಮಾಣವಾಯಿತು. ವಿಮಾನಯಾನ ಸಂಸ್ಥೆಯು ಪ್ರಯಾಣಿಕರಿಗೆ ಕೂಡಲೇ ಸ್ಪಂಧಿಸಿ ಗೊಂದಲ ಬಗೆಹರಿಸಿದೆ ಎಂದು ಮೂಲಗಳು ತಿಳಿಸಿವೆ.