ಬೆಂಗಳೂರು: ಭಾರತದ ಇತಿಹಾಸದಲ್ಲೇ ಮೊದಲ ಬಾರಿಗೆ ಭಾರತೀಯ ಸೇನೆಗೆ ಮಹಿಳಾ ಪೊಲೀಸರು ಬೆಂಗಳೂರಿನಲ್ಲಿ ಕಠಿಣ ತರಬೇತಿ ಮುಗಿಸಿ ಮೇ ತಿಂಗಳಿನಲ್ಲಿ ಭಾರತೀಯ ಸೇನೆ ಸೇರಲಿರುವ ಸಂತೋಷದ ಸುದ್ದಿ ಬಂದಿದೆ.. ಮೊದಲ ಬ್ಯಾಚಿನ ಮಹಿಳಾ ಸಿಪಾಯಿಗಳನ್ನು ಸೇನೆಗೆ ತಯಾರಿ ಮಾಡಿರುವ ಹೆಮ್ಮೆ ಬೆಂಗಳೂರಿನದ್ದಾಗಿದೆ.
ನೀಲಸಂದ್ರದ ಕೋರ್ ಮಿಲಿಟರಿ ಪೊಲೀಸ್ ಪ್ರದೇಶದ 5 ಕಿಲೋ ಮೀಟರ್ ವಿಸ್ತೀರ್ಣದ ಕ್ಯಾಂಪಸ್ ನಲ್ಲಿ 100 ಮಹಿಳಾ ಅಭ್ಯರ್ಥಿಗಳಿಗೆ ಜನವರಿ 2020 ರಿಂದ ಮಿಲಿಟರಿ ಪೊಲೀಸ್ ತರಬೇತಿ ನೀಡಲಾಗುತ್ತಿದೆ. 100 ಹುದ್ದೆಗಳ ಪೈಕಿ 8 ಅಭ್ಯರ್ಥಿಗಳು ಕರ್ನಾಟಕಕ್ಕೆ ಸೇರಿದವರು ಅನ್ನೋದು ನಮಗೆಲ್ಲ ಹೆಮ್ಮೆಯ ವಿಚಾರ. ಅದರಲ್ಲೂ ಬೆಳಗಾವಿಯ ಇಸ್ಲಾಂಪುರ, ಖಾನಾಪುರ, ಕಾಗವಾಡ, ಬೈಲಹೊಂಗಲ, ವಾಲ್ವೇಡ, ಸಂಕೇಶ್ವರ ಹಾಗೂ ಧಾರವಾಡದ ಮದಿಕೊಪ್ಪದ ಮಹಿಳೆಯರು ಸೇನಾ ತರಬೇತಿಯಲ್ಲಿ ಭಾಗಿಯಾಗಿ ಸದ್ಯದಲ್ಲೇ ದೇಶ ಸೇವೆಗೆ ಸೇರಲಿದ್ದಾರೆ.
ಪ್ರಾಥಮಿಕ ತರಬೇತಿ ಅವಧಿ 29 ವಾರಗಳು, ಸುಧಾರಿತ ತರಬೇತಿ ಅವಧಿ 26 ವಾರ ಹಾಗೂ 6 ವಾರಗಳ ರಜಾ ಅವಧಿ ಟ್ರೈನಿಂಗ್ ಮಾಡ್ಯುಲ್ ನಲ್ಲಿದೆ. ಪ್ರಾಥಮಿಕ ತರಬೇತಿಯಲ್ಲಿ ಭಾವಿ ಮಹಿಳಾ ಮಿಲಿಟರಿ ಪೊಲೀಸರಿಗೆ 5 ಕಿ.ಮೀ ಓಟ, ಡ್ರಿಲ್, ದೈಹಿಕ ಕಸರತ್ತು, ಶಸ್ತ್ರಾಸ್ತ್ರ ಬಳಕೆ, 2.5 ಟನ್ ಸಾಮರ್ಥ್ಯದ ಟ್ರಕ್ ಚಾಲನೆ, ದ್ವಿಚಕ್ರ ವಾಹನ ಚಾಲನಾ ತರಬೇತಿ, ಟ್ರಾಫಿಕ್ ಮತ್ತು ಯುದ್ಧ ಭೂಮಿಯಲ್ಲಿ ಸಂವಹನ ನಡೆಸುವ ಕೌಶಲ್ಯವನ್ನು ಇಲ್ಲಿ ಹೇಳಿಕೊಡಲಾಗಿದೆ. ಮಹಿಳೆಯರಿಗಾಗಿ ಇಲ್ಲಿ ಸ್ವಿಮ್ಮಿಂಗ್, ಬಾಕ್ಸಿಂಗ್, ಉದ್ದ ಮತ್ತು ಹಗಲವಾಗಿ ಹಗ್ಗದಿಂದ ಸಾಗುವ ತರಬೇತಿ, ಮಹಿಳೆಯರು ಮತ್ತು ಮಕ್ಕಳ ಮೇಲಿನ ದೌರ್ಜನ್ಯದ ತನಿಖೆ, ಅತ್ಯಾಚಾರ, ಆತ್ಮಹತ್ಯೆ ಪ್ರಕರಣ ಬೇಧಿಸುವಿಕೆ, ಯುದ್ಧ ನಡೆಯುವ ಸಂದರ್ಭದಲ್ಲಿ ಕ್ಯಾಂಪ್ ನಲ್ಲಿ ಡೇರಿ ಸಿದ್ಧಪಡಿಸುವ ಟ್ರೈನಿಂಗ್, ವಿಧಿ ವಿಜ್ಞಾನದ ಕೌಶಲ್ಯಗಳನ್ನು 61 ವಾರಗಳ ತರಬೇತಿ ಅವಧಿಯಲ್ಲಿ ತಿಳಿಸಿಕೊಡಲಾಗುತ್ತದೆ.
ಮೊದಲ ಬಾರಿಗೆ ಸೈನಿಕರಾಗಿ ತರಬೇತಿಗೆ ಸೇರಿದ
ಮಹಿಳಾ ಸಿಪಾಯಿಗಳಿಗೆ ತರಬೇತಿಯ ಕಮಾಂಡಿಂಗ್ ಆಫೀಸರ್ ಲೆಫ್ಟಿನೆಂಟ್ ಕರ್ನಲ್ ಜೂಲಿ ನೇತೃತ್ವದಲ್ಲಿ ತರಬೇತಿ ನಿಡಲಾಗುತ್ತಿದೆ. ಕರ್ನಲ್ ಜ್ಯೂಲಿ ದೇಶದ ಜಮ್ಮು ಮತ್ತು ಕಾಶ್ಮೀರ, ನಾಗಾಲ್ಯಾಂಡ್ ಸೇರಿದಂತೆ ಭಯೋತ್ಪಾದನಾ ಪ್ರದೇಶಗಳಲ್ಲಿ ಕೆಲಸ ಮಾಡಿದ 16 ವರ್ಷಗಳ ಅಪಾರ ಅನುಭವವನ್ನು ತಾಳ್ಮೆಯಿಂದ ಬಾವಿ ಮಹಿಳಾ ಸಿಪಾಯಿಗಳಿಗೆ ಧಾರೆ ಎರೆಯುತ್ತಿದ್ದಾರೆ.
ಈತನಕ ರಕ್ಷಣಾ ಪಡೆಯಲ್ಲಿ ಮಹಿಳಾ ಅಧಿಕಾರಿಗಳನ್ನು ಮಾತ್ರ ನೇಮಕಾತಿ ಮಾಡಲಾಗುತ್ತಿತ್ತು. ಇದೇ ಮೊದಲ ಬಾರಿಗೆ ರಕ್ಷಣಾ ಇಲಾಖೆಯಲ್ಲಿ ಅಧಿಕಾರಿಗಳಿಗಿಂತ ಕೆಳ ಹಂತದ ದರ್ಜೆಯ ಮಹಿಳಾ ಸಿಪಾಯಿಗಳ ನೇಮಕಾತಿ
ಭಾರತೀಯ ಸೇನೆಯ ಮಿಲಿಟರಿ ಪೊಲೀಸ್ ಮೂಲಕ ಮಾಡಲಾಗುತ್ತಿದೆ ಎಂದು ಹೇಳುತ್ತಾರೆ ಕಮಾಂಡೆಂಟ್ ಸಿ ದಯಾಳನ್.
ಈಗಾಗಲೇ ಮೊದಲ ಬ್ಯಾಚಿನ 100 ಮಹಿಳಾ
ಅಭ್ಯರ್ಥಿಗಳ ತರಬೇತಿ ಬಹುತೇಕ ಪೂರ್ಣಗೊಂಡು ಇದೇ ಏಪ್ರಿಲ್ ನಲ್ಲಿ ಭಾರತೀಯ ಸೇನೆ ಸೇರಲಿದ್ದಾರೆ. ದೇಶದ ವಿವಿಧೆಡೆ ಶೇ.60 ರಷ್ಟು ಪೊಲೀಸರು ಶಾಂತಿ ನೆಲೆಸಿರುವ ದೇಶದ ಆಂತರಿಕ ಸ್ಥಳದಲ್ಲಿ ಶೇ.40 ಮಹಿಳಾ ಪೊಲೀಸರನ್ನು ಭಯೋತ್ಪಾದನೆ, ಅಶಾಂತಿ ನೆಲಸಿರುವ ಸ್ಥಳ, ದೇಶದ ಭಯೋತ್ಪಾದನಾ ಪೀಡಿತ ಗಡಿ ಪ್ರದೇಶಗಳಲ್ಲಿ ನಿಯೋಜನೆ ಮಾಡಲಾಗುತ್ತದೆ” ಎಂದು ಹೇಳುತ್ತಾರೆ ಮಹಿಳಾ ಮಿಲಿಟರಿ ಪೊಲೀಸ್
ಕಮಾಂಡಿಂಗ್ ಆಫೀಸರ್ ಜ್ಯೂಲಿ.
ತರಬೇತಿಯಲ್ಲಿನ ಕರ್ನಾಟಕದ ಜ್ಯೋತಿ ಹೇಳುವ ಹಾಗೆ ” ತಮಗೆ ಎಸ್ ಎಸ್ ಎಲ್ ಸಿಯಿಂದಲೇ ಸೇನೆಗೆ ಸೇರುವ ಹಂಬಲವಿತ್ತು. ಡಿಗ್ರಿ ಓದುವಾಗಲೇ ಮಹಿಳಾ ಮಿಲಿಟರಿ ಪೊಲೀಸ್ ಹುದ್ದೆಗೆ ಅರ್ಜಿ ಆಹ್ವಾನ ಬಂದಾಗ, ಮಿಲಿಟರಿ ನರ್ಸಿಂಗ್ ಗೆ ಅವಕಾಶ ಸಿಗುತ್ತದೆ ಅಂತ ಅರ್ಜಿ ಹಾಕಿದೆ. ಆದರೆ ಲಕ್ಷಾಂತರ ಮಹಿಳೆಯರು ಅರ್ಜಿ ಹಾಕಿದ್ದರೂ ತಮಗೆ ದೇಶ ಸೇವೆ ಮಾಡುವ ಅವಕಾಶ ದೊರೆತಿದೆ. ನಮ್ಮ ತಂದೆ ಮಾಜಿ ಸೈನಿಕರಾಗಿದ್ದರೂ ನಾನು ಸೇನೆಗೆ ಸೇರುವ ಬಗ್ಗೆ ಸ್ವಲ್ಪ ಹಿಂದೇಟು ಹಾಕಿದ್ದರು. ಆದರೆ ತಾಯಿಯವರು ಸೇನೆಗೆ ಸೇರಲು ಪ್ರೋತ್ಸಾಹ ನೀಡಿದರು. ಹಾಗಾಗಿ ಇಂದು ಬಹುತೇಕ ಮಿಲಿಟರಿ ಮಹಿಳಾ ಪೊಲೀಸ್ ತರಬೇತಿ ಪಡೆದುಕೊಂಡೆ. ಈಗ ದೇಶ ಸೇವೆಗೆ ಹೋಗುತ್ತಿರುವ ಬಗ್ಗೆ ಹೆಮ್ಮೆಯಾಗುತ್ತಿದೆ’ ಎಂದು ಜ್ಯೋತಿ ಪ್ರತಿಕ್ರಿಯಿಸಿದ್ದಾರೆ.
61 ವಾರಗಳ ವಿಶೇಷ ಕಠಿಣ ತರಬೇತಿ. 61 ವಾರಗಳ ತರಬೇತಿ ಅವಧಿಯಲ್ಲಿ 50 ಅಭ್ಯರ್ಥಿಗಳ ತಲಾ 2 ತಂಡಗಳಲ್ಲಿ ಮಹಿಳಾ ಸೈನಿಕರಿಗೆ ತರಬೇತಿ
ನೀಡಲಾಗುತ್ತಿದೆ. ಪ್ರಾಥಮಿಕ 29 ವಾರಗಳ ತರಬೇತಿ, ನಂತರ 3 ವಾರ ರಜೆ. ಅದಾದ ನಂತರ 26 ವಾರಗಳ ಅಡ್ವಾನ್ಸ್ ಟ್ರೈನಿಂಗ್ ಹಾಗೂ ಅದಾದ ನಂತರ 3 ವಾರಗಳ ರಜೆ ಹೀಗೆ ತರಬೇತಿಯ ರಚನೆಯಿರುತ್ತದೆ.
ಬೆಂಗಳೂರಿನ ಸಿಎಂಪಿ ತರಬೇತಿ ಕೇಂದ್ರದಲ್ಲಿ ಈ
ಮಹಿಳೆಯರನ್ನು ಪುರುಷ ಸೈನಿಕರಿಗೆ ಸಮನಾಗಿ
ಸಜ್ಜುಗೊಳಿಸುತ್ತಿದ್ದೇವೆ. ದೇಶಾದ್ಯಂತ ಕೋರ್ ಮಿಲಿಟರಿ ಪೊಲೀಸ್ ನ ಒಟ್ಟು 100 ಯೂನಿಟ್ ಗಳಿದ್ದು, ಒಂದೊಂದು ಯೂನಿಟ್ ನಲ್ಲಿ 39 ಸೈನಿಕರಿಂದ ಹಿಡಿದು 90 ಜನ ಸೈನಿಕರು ಇರುತ್ತಾರೆ. ಆ ಪೈಕಿ ಶೇ.20ರಷ್ಟುಮಂದಿ ಮಹಿಳಾ ಮಿಲಿಟರಿ ಪೋಲಿಸ್ ಹೊಂದಿರಬೇಕು. ಹಾಗಾಗಿ ಪ್ರತಿವರ್ಷ ತಲಾ 100 ಮಂದಿ ಮಹಿಳಾ ಪೊಲೀಸರಿಗೆ ತರಬೇತಿ ನೀಡಿ 2037 ರ ಇಸವಿ ವೇಳೆಗೆ ಒಟ್ಟು 1,700 ಮಹಿಳಾ ಮಿಲಿಟರಿ ಪೊಲೀಸರನ್ನು ಸಿಎಂಪಿಗೆ ಸೇರಿಸುವ ಉದ್ದೇಶ ಹೊಂದಿದೆ” ಎಂದು ಕಮಾಂಡಿಂಗ್ ಅಫೀಸರ್ ಜೂಲಿ ಗರುಡ ವಾಯ್ಸ್ ಗೆ ತಿಳಿಸಿದ್ದಾರೆ.
2 ಲಕ್ಷ ಅರ್ಜಿಗಳಲ್ಲಿ 100 ಮಂದಿಯಷ್ಟೆ ಆಯ್ಕೆ
100 ಮಹಿಳಾ ಮಿಲಿಟರಿ ಪೊಲೀಸ್ ಹುದ್ದೆಗಾಗಿ
ದೇಶಾದ್ಯಂತ 2 ಲಕ್ಷ ಮಹಿಳಾ ಅಭ್ಯರ್ಥಿಗಳು ಅರ್ಜಿ
ಸಲ್ಲಿಸಿದ್ದರು. ಆ ಪೈಕಿ ದೈಹಿಕ ಸಾಮರ್ಥ್ಯ, ಲಿಖಿತ ಹಾಗೂ ವೈದ್ಯಕೀಯ ಪರೀಕ್ಷೆಯಲ್ಲಿ ಉತ್ತೀರ್ಣರಾದವರನ್ನು ಆಯ್ಕೆ ಮಾಡಲಾಗಿದೆ. ಡಬ್ಲ್ಯುಎಂಪಿ ಪೊಲೀಸರ ಹುದ್ದೆಗೆ SSLC ವಿದ್ಯಾರ್ಹತೆಯಿದೆ. ಆದರೆ ಈ ತರಬೇತಿಗೆ 21 ಡಿಗ್ರಿ ಹಾಗೂ ಉಳಿದವರು ದ್ವಿತೀಯ ಪಿಯುಸಿ ತೇರ್ಗಡೆಯಾದವರು ಆಯ್ಕೆಯಾಗಿದ್ದಾರೆ.
