ನವದೆಹಲಿ: ಜಗತ್ತನ್ನು ಬೆಚ್ಚಿಬೀಳಿಸಿದ್ದ ಕೋವಿಡ್ ಸೋಂಕಿನ ಮಾದರಿಯಲ್ಲೇ ಮತ್ತೊಂದು ವೈರಾಣು ಹಾವಳಿ ಚೀನಾದಲ್ಲಿ ತಲ್ಲಣ ಸೃಷ್ಟಿಸಿದೆ. ಈ ಮತ್ತೊಂದು ನಿಗೂಢ ವೈರಾಣು ಬಗ್ಗೆ ವಿಶ್ವದೆಲ್ಲೆಡೆ ಆತಂಕ ಎದುರಾಗಿದೆ.
ಕೋವಿಡ್ -19 ಸೋಂಕು ಉಲ್ಬಣಗೊಂಡ ಐದು ವರ್ಷಗಳ ನಂತರ, ಚೀನಾದಲ್ಲಿ ಹೊಸ ಉಸಿರಾಟ ತೊಂದರೆಯನ್ನು ಕಾಡುವ ಹ್ಯೂಮನ್ ಮೆಟಾಪ್ನ್ಯೂಮೋವೈರಸ್ (HMPV) ಎಂಬ ಸೋಂಕು ಕಾಣಿಸಿಕೊಂಡಿದೆ.
ಈ HMPV ವೈರಸ್ ವೇಗವಾಗಿ ಹರಡುತ್ತಿದೆ ಎಂದು ಹಲವಾರು ಮಾಧ್ಯಮ ವರದಿಗಳು ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿನ ಪೋಸ್ಟ್’ಗಳು ಆತಂಕ ಹೆಚ್ಚಿಸಿವೆ. ಚೀನಾದ ಆಸ್ಪತ್ರೆಗಳು HMPV ಸೋಂಕಿಗೆ ಒಳಗಾದವರಿಂದ ತುಂಬಿಹೋಗಿವೆ ಎಂಬ ವೀಡಿಯೊಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಎಂದು ಖ್ಯಾತ ಮಾಧ್ಯಮ ‘ಏಷ್ಯಾ ಪೋಸ್ಟ್’ (Asia Post) ವರದಿ ಮಾಡಿದೆ.
HMPV ಪ್ರಕರಣಗಳ ಹೆಚ್ಚಳವು ಹಠಾತ್ ಸಾವುಗಳ ಆತಂಕಕಾರಿ ಸನ್ನಿವೇಶ ಸೃಷ್ಟಿಸಬಹುದೆಂದು ಹೇಳಲಾಗುತ್ತಿದ್ದು, 40 ರಿಂದ 80 ವರ್ಷ ವಯಸ್ಸಿನವರ ಮೇಲೆ ವಿಶೇಷವಾಗಿ ಪರಿಣಾಮ ಬೀಳಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
2001 ರಲ್ಲಿ ಪತ್ತೆಯಾದ HMPV, ಉಸಿರಾಟದ ಸಿನ್ಸಿಟಿಯಲ್ ವೈರಸ್ (RSV) ಜೊತೆಗೆ ನ್ಯೂಮೋವಿರಿಡೆ ಪರಿವಾರದಲ್ಲಿ ಕಾಣಿಸಿಕೊಳ್ಳಬಹುದು. ಆದಾಗ್ಯೂ, ಸೆರೋಲಾಜಿಕಲ್ ಅಧ್ಯಯನಗಳು ಇದು ಮಾನವರಲ್ಲಿ 60 ವರ್ಷಗಳಿಗೂ ಹೆಚ್ಚು ಕಾಲ ಅಸ್ತಿತ್ವದಲ್ಲಿರಬಲ್ಲದು ಮತ್ತು ಪ್ರಪಂಚದಾದ್ಯಂತ ಅವರಿಸಿಕೊಳ್ಳುವಥದ್ದು ಎಂದು ಅಧ್ಯಯನದಲ್ಲಿ ತಿಳಿದುಬಂದಿದೆ.
ವೈರಸ್ ಎಲ್ಲಾ ವಯಸ್ಸಿನ ಜನರಲ್ಲಿ ಉಸಿರಾಟದ ತೊಂದರೆಗೆ ಕಾರಣವಾಗಬಹುದು. ಚಿಕ್ಕ ಮಕ್ಕಳು, ವಯಸ್ಕರು ಮತ್ತು ದುರ್ಬಲ ರೋಗನಿರೋಧಕ ಶಕ್ತಿ ಹೊಂದಿರುವವಾರ ಮೇಲೆ ಹೆಚ್ಚಾಗಿ ಪರಿಣಾಮ ಬೀರುತ್ತದೆ. ಯುಎಸ್ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್ (CDC) ಪ್ರಕಾರ, ಸಾಮಾನ್ಯವಾಗಿ HMPV ಯೊಂದಿಗೆ ಸಂಬಂಧಿಸಿದ ರೋಗಲಕ್ಷಣಗಳು ಕೆಮ್ಮು, ಜ್ವರ, ಮೂಗಿನ ದಟ್ಟಣೆ ಮತ್ತು ಉಸಿರಾಟದ ತೊಂದರೆಗಳನ್ನು ಒಳಗೊಂಡಿರುತ್ತದೆ.
ಕ್ಯಾಪಿಟಲ್ ಮೆಡಿಕಲ್ ಯೂನಿವರ್ಸಿಟಿಯ ಬೀಜಿಂಗ್ ಯುವಾನ್ ಆಸ್ಪತ್ರೆಯ ಉಸಿರಾಟ ಮತ್ತು ಸಾಂಕ್ರಾಮಿಕ ರೋಗಗಳ ವಿಭಾಗದ ಮುಖ್ಯ ವೈದ್ಯ ಲಿ ಟಾಂಗ್ಜೆಂಗ್, ಉಸಿರಾಟದ ಹನಿಗಳು ಮತ್ತು ಹ್ಯಾಂಡ್ಶೇಕ್ಗಳಂತಹ ಜನರಿಂದ ಜನರ ಸಂಪರ್ಕದ ಮೂಲಕ HMPV ಅನ್ನು ವ್ಯಕ್ತಿಯಿಂದ ವ್ಯಕ್ತಿಗೆ ಹರಡಬಹುದು ಎಂದು ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಇದು ಮೂರರಿಂದ ಐದು ದಿನಗಳವರೆಗೆ ಕಾವುಕೊಡುವ ಅವಧಿಯನ್ನು ಹೊಂದಿದೆ. ಹಾಗಾಗಿ ಮಾಸ್ಕ್ ಧರಿಸುವುದು, ಆಗಾಗ್ಗೆ ಕೈ ತೊಳೆಯುವುದು ಮತ್ತು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವುದರಿಂದ ಸೋಂಕಿನಿಂದ ಪಾರಾಗಬಹುದು ಎಂಬುದು ಈ ತಜ್ಞರ ಸಲಹೆಯಾಗಿದೆ. ಆದರೆ, ಎಚ್ಎಂಪಿವಿಗಾಗಿ ಆಂಟಿವೈರಲ್ಗಳನ್ನು ಬಳಸುವುದರ ವಿರುದ್ಧ ತಜ್ಞರು ಎಚ್ಚರಿಕೆ ನೀಡಿದ್ದಾರೆ.
2023 ರಲ್ಲಿ ನೆದರ್ಲ್ಯಾಂಡ್ಸ್, ಬ್ರಿಟನ್, ಫಿನ್ಲ್ಯಾಂಡ್, ಆಸ್ಟ್ರೇಲಿಯಾ, ಕೆನಡಾ, ಅಮೇರಿಕ ಮತ್ತು ಚೀನಾದಲ್ಲಿ HMPV ಪತ್ತೆಯಾಗಿತ್ತು.
