ನವದೆಹಲಿ: ಕಳೆದ ದಶಕದಲ್ಲಿ ಭಾರತೀಯ ರೈಲ್ವೆ ಸುರಕ್ಷತೆಯ ಮೇಲಿನ ವೆಚ್ಚವನ್ನು ಮೂರರಷ್ಟು ಹೆಚ್ಚಿಸಿ 2013–14ರಲ್ಲಿ ₹39,200 ಕೋಟಿಯಿಂದ 2025–26ರಲ್ಲಿ ₹1,17,693 ಕೋಟಿಗೆ ಏರಿಸಲಾಗಿದೆ ಎಂದು ಕೇಂದ್ರ ಸರ್ಕಾರ ಶುಕ್ರವಾರ ಸಂಸತ್ತಿಗೆ ತಿಳಿಸಿದೆ.
ರಾಜ್ಯಸಭೆಯಲ್ಲಿ ಲಿಖಿತ ಉತ್ತರ ನೀಡಿದ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್, “ಭಾರತೀಯ ರೈಲ್ವೆಯಲ್ಲಿ ಸುರಕ್ಷತೆಗೆ ಅತ್ಯಂತ ಆದ್ಯತೆ ನೀಡಲಾಗಿದೆ. ವಿವಿಧ ಸುರಕ್ಷತಾ ಕ್ರಮಗಳ ಪರಿಣಾಮವಾಗಿ ಅಪಘಾತಗಳ ಸಂಖ್ಯೆಯಲ್ಲಿ ಗಮನಾರ್ಹ ಇಳಿಕೆ ಕಂಡುಬಂದಿದೆ” ಎಂದು ಹೇಳಿದ್ದಾರೆ.
ಸ್ವದೇಶಿ ತಂತ್ರಜ್ಞಾನವಾದ ‘ಕವಚ್’ ಸ್ವಯಂಚಾಲಿತ ರೈಲು ರಕ್ಷಣಾ (ATP) ವ್ಯವಸ್ಥೆಯನ್ನು ಪ್ರಮುಖ ಮಾರ್ಗಗಳಲ್ಲಿ ಅಳವಡಿಸಲಾಗುತ್ತಿದೆ. ಲೊಕೊ ಪೈಲಟ್ ವೈಫಲ್ಯಗೊಂಡರೆ ಸ್ವಯಂಚಾಲಿತವಾಗಿ ಬ್ರೇಕ್ ಅನ್ವಯಿಸುವ ಮೂಲಕ ನಿರ್ದಿಷ್ಟ ವೇಗ ಮಿತಿಯೊಳಗೆ ರೈಲು ಸಂಚಾರವನ್ನು ಖಚಿತಪಡಿಸುವುದು ಇದರ ಉದ್ದೇಶವಾಗಿದೆ. 2025ರ ಡಿಸೆಂಬರ್ ತನಕ ಕವಚ್ ಕಾಮಗಾರಿಗಳಿಗೆ ₹2,573.36 ಕೋಟಿ ವೆಚ್ಚ ಮಾಡಲಾಗಿದೆ. 2025–26ನೇ ಸಾಲಿಗೆ ₹1,673.19 ಕೋಟಿ ಹಂಚಿಕೆ ಮಾಡಲಾಗಿದೆ.
ದಕ್ಷಿಣ ಮಧ್ಯ ರೈಲ್ವೆಯಲ್ಲಿ ಅನುಭವದ ಆಧಾರದ ಮೇಲೆ ಸುಧಾರಣೆಗಳೊಂದಿಗೆ ‘ಕವಚ್’ ಆವೃತ್ತಿ 4.0 ಅನ್ನು ಜುಲೈ 2024ರಲ್ಲಿ Research Designs and Standards Organisation (RDSO) ಅನುಮೋದಿಸಿದೆ. ಇದುವರೆಗೆ 1,297 ರೂಟ್ ಕಿ.ಮೀ.ಗಳಲ್ಲಿ ವ್ಯವಸ್ಥೆ ಅಳವಡಿಸಲಾಗಿದೆ. ದೆಹಲಿ–ಮುಂಬೈ ಹಾಗೂ ದೆಹಲಿ–ಹೌರಾ ಮಾರ್ಗಗಳ ಭಾಗಗಳು ಇದರಲ್ಲಿ ಸೇರಿವೆ. ಜೊತೆಗೆ 23,360 ರೂಟ್ ಕಿ.ಮೀ.ಗಳಲ್ಲಿ ಟ್ರ್ಯಾಕ್ಸೈಡ್ ಕವಚ್ ಅನುಷ್ಠಾನ ಪ್ರಕ್ರಿಯೆ ಆರಂಭಿಸಲಾಗಿದೆ.
ಕವಚ್ ತಂತ್ರಜ್ಞಾನ ಕುರಿತು 48,000ಕ್ಕೂ ಹೆಚ್ಚು ಸಿಬ್ಬಂದಿಗೆ ತರಬೇತಿ ನೀಡಲಾಗಿದೆ. ಇದರಲ್ಲಿ ಸುಮಾರು 45,000 ಲೊಕೊ ಪೈಲಟ್ಗಳು ಹಾಗೂ ಸಹಾಯಕ ಲೊಕೊ ಪೈಲಟ್ಗಳು ಸೇರಿದ್ದಾರೆ. ಟ್ರ್ಯಾಕ್ಸೈಡ್ ಉಪಕರಣಗಳ ವೆಚ್ಚವು ಪ್ರತಿ ಕಿ.ಮೀಗೆ ಸುಮಾರು ₹50 ಲಕ್ಷವಾಗಿದ್ದು, ಲೊಕೊಮೋಟಿವ್ಗಳಲ್ಲಿ ಉಪಕರಣ ಅಳವಡಿಸಲು ಪ್ರತಿ ಲೊಕೊಗೆ ಸುಮಾರು ₹80 ಲಕ್ಷ ವೆಚ್ಚವಾಗುತ್ತದೆ.
ಪ್ರಯಾಣಿಕರ ಸುರಕ್ಷತೆ ಹೆಚ್ಚಿಸಲು ಕೋಚ್ಗಳು ಮತ್ತು ಲೊಕೊಮೋಟಿವ್ಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳನ್ನೂ ಅಳವಡಿಸಲಾಗುತ್ತಿದೆ. ಇದುವರೆಗೆ ಸುಮಾರು 12,300 ಬೋಗಿಗಳು (ವಂದೇ ಭಾರತ್ ಮತ್ತು ಅಮೃತ ಭಾರತ್ ರೈಲುಗಳ ರೇಕ್ಗಳು ಸೇರಿದಂತೆ) ಹಾಗೂ 460 ಲೊಕೊಮೋಟಿವ್ಗಳಲ್ಲಿ ಸಿಸಿಟಿವಿ ವ್ಯವಸ್ಥೆ ಅಳವಡಿಸಲಾಗಿದೆ ಎಂದು ಸಚಿವರು ತಿಳಿಸಿದ್ದಾರೆ.
