ನವದೆಹಲಿ: ರಾಷ್ಟ್ರ ರಾಜಧಾನಿಯಲ್ಲಿ ಹುಡುಗಿಯರು ಹಾಗೂ ಮಹಿಳೆಯರ ಸುರಕ್ಷತೆ ಕುರಿತು ಜಾಗೃತಿ ಮೂಡಿಸುವ ಉದ್ದೇಶದಿಂದ ನಟಿ ರಾಣಿ ಮುಖರ್ಜಿ ದೆಹಲಿ ಪೊಲೀಸರೊಂದಿಗೆ ಕೈಜೋಡಿಸಿದ್ದಾರೆ. ಮಹಿಳೆಯರ ಸುರಕ್ಷತೆಯೇ ಸಮಾಜದ ಮೌಲ್ಯವನ್ನು ನಿರ್ಧರಿಸುವ ಮಾನದಂಡ ಎಂದು ಅವರು ಈ ಸಂದರ್ಭದಲ್ಲಿ ಅಭಿಪ್ರಾಯಪಟ್ಟರು.
“ಸುರಕ್ಷತೆ ಯಾವುದೇ ಸವಲತ್ತು ಅಲ್ಲ, ಅದು ಪ್ರತಿಯೊಬ್ಬರ ಹಕ್ಕು. ಈ ದೇಶದ ಯಾವುದೇ ಹುಡುಗಿ ಭಯವನ್ನು ಮೊದಲ ಪಾಠವಾಗಿ ಕಲಿಯಬಾರದು. ಮಹಿಳೆಯರನ್ನು ರಕ್ಷಿಸುವ ರೀತಿಯಲ್ಲೇ ಒಂದು ಸಮಾಜದ ಶಕ್ತಿ ಅಳೆಯಲ್ಪಡುತ್ತದೆ. ಆ ಜವಾಬ್ದಾರಿಯ ಮುಂಚೂಣಿಯಲ್ಲಿ ಪೊಲೀಸರು ನಿಲ್ಲುತ್ತಾರೆ,” ಎಂದು ರಾಣಿ ಹೇಳಿದ್ದಾರೆ.
ಪ್ರತಿ ಪೊಲೀಸ್ ಸಮವಸ್ತ್ರವು ಜವಾಬ್ದಾರಿ, ಧೈರ್ಯ ಮತ್ತು ಸಹಾನುಭೂತಿಯನ್ನು ಪ್ರತಿನಿಧಿಸುತ್ತದೆ ಎಂದು ಅವರು ಹೇಳಿದರು. “ಮನೆಯಿಂದ ಹೊರಡುವ ಪ್ರತಿಯೊಬ್ಬ ಮಹಿಳೆಯೂ ಆತ್ಮವಿಶ್ವಾಸದಿಂದ ಇರಬೇಕು. ಹುಡುಗಿಯರು ಮತ್ತು ಮಹಿಳೆಯರ ಸುರಕ್ಷತೆಯನ್ನು ಖಚಿತಪಡಿಸುವ ಹೊಣೆಗಾರಿಕೆಯನ್ನು ದೆಹಲಿ ಪೊಲೀಸ್ ಪಡೆ ಸದಾ ಹೊತ್ತಿರಬೇಕು” ಎಂದು ರಾಣಿ ಅಭಿಪ್ರಾಯ ವ್ಯಕ್ತಪಡಿಸಿದರು.
ಕಾನೂನು ಮಹಿಳೆಯರೊಂದಿಗೆ ದೃಢವಾಗಿ ನಿಂತಿದೆ ಎಂದು ತಿಳಿಸಿದ ಅವರು, “ಮಹಿಳೆಯರು ತಮ್ಮ ಹೆಗಲ ಮೇಲೆ ಭಯದಿಂದ ನೋಡಿಕೊಂಡು ನಡೆಯುವ ಸಮಾಜ ಮುಂದೆ ಸಾಗಲಾರದು. ರಾಷ್ಟ್ರ ರಾಜಧಾನಿಯಾದ್ಯಂತ ಹುಡುಗಿಯರು ಮತ್ತು ಮಹಿಳೆಯರನ್ನು ಸುರಕ್ಷಿತವಾಗಿಡಲು ದೆಹಲಿ ಪೊಲೀಸರ ಸಮರ್ಪಣೆ ಹಾಗೂ ಸ್ಥಿತಿಸ್ಥಾಪಕತೆಗೆ ನಾನು ವಂದಿಸುತ್ತೇನೆ” ಎಂದರು.
ಈ ನಡುವೆ ರಾಣಿ ಮುಖರ್ಜಿ ಅಭಿನಯದ ‘ಮರ್ದಾನಿ’ ಸರಣಿಯ ಮೂರನೇ ಭಾಗದ ಕುರಿತು ಮಾಹಿತಿ ಹೊರಬಿದ್ದಿದೆ. ‘ಮರ್ದಾನಿ 3’ ಕಡಿಮೆ ಆದಾಯದ ಕುಟುಂಬಗಳಿಗೆ ಸೇರಿದ 8–9 ವರ್ಷದ ಬಾಲಕಿಯರ ಅಪಹರಣದ ಗಂಭೀರ ವಿಷಯವನ್ನು ಕೇಂದ್ರೀಕರಿಸಲಿದೆ ಎಂದು ತಿಳಿದುಬಂದಿದೆ. ಚಿತ್ರದ ಕಥಾವಸ್ತುವನ್ನು ತಯಾರಕರು ಇತ್ತಿಚಿನವರೆಗೆ ರಹಸ್ಯವಾಗಿಯೇ ಉಳಿಸಿಕೊಂಡಿದ್ದಾರೆ.
‘ಮರ್ದಾನಿ’ ಮಾನವ ಕಳ್ಳಸಾಗಣೆಯ ವಾಸ್ತವಗಳನ್ನು ಅನಾವರಣಗೊಳಿಸಿದ್ದರೆ, ‘ಮರ್ದಾನಿ 2’ ಸರಣಿ ಅತ್ಯಾಚಾರಿಯ ಮನೋವೈಕಲ್ಯವನ್ನು ಅನ್ವೇಷಿಸಿತ್ತು. ‘ಮರ್ದಾನಿ 3’ ಸಮಾಜದ ಮತ್ತೊಂದು ಕರಾಳ ಸತ್ಯವನ್ನು ತೆರೆದಿಡಲಿದೆ ಎಂದು ಹೇಳಲಾಗಿದೆ.
ಈ ಚಿತ್ರವನ್ನು ಆದಿತ್ಯ ಚೋಪ್ರಾ ನಿರ್ಮಿಸಿದ್ದು, ಅಭಿರಾಜ್ ಮಿನಾವಾಲಾ ನಿರ್ದೇಶನ ಮಾಡಿದ್ದಾರೆ. ‘ಶೈತಾನ್’ ಖ್ಯಾತಿಯ ನಟಿ ಜಾನಕಿ ಬೋಡಿವಾಲಾ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ‘ದಿ ರೈಲ್ವೇ ಮೆನ್’ ಖ್ಯಾತಿಯ ಆಯುಷ್ ಗುಪ್ತಾ ಕಥೆ ಬರೆದಿದ್ದಾರೆ. ‘ಮರ್ದಾನಿ 3’ ಜನವರಿ 30ರಂದು ವಿಶ್ವದಾದ್ಯಂತ ತೆರೆಗೆ ಬರಲಿದೆ.
