ಶ್ರೀನಗರ: ಜಮ್ಮು-ಕಾಶ್ಮೀರದಲ್ಲಿ ನಡೆಯುತ್ತಿರುವ ಪ್ರಸಿದ್ಧ ಅಮರನಾಥ ಯಾತ್ರೆಯಲ್ಲಿ ಕಳೆದ 12 ದಿನಗಳಲ್ಲಿ 2.20 ಲಕ್ಷಕ್ಕೂ ಹೆಚ್ಚು ಭಕ್ತರು ಪವಿತ್ರ ಗುಹಾದರ್ಶನ ಪಡೆದು ಭಕ್ತಿ ಸಂಭ್ರಮದಲ್ಲಿ ಪಾಲ್ಗೊಂಡಿದ್ದಾರೆ. ಜುಲೈ 3ರಂದು ಆರಂಭವಾದ ಈ ಯಾತ್ರೆಯು ಭಾರೀ ಭದ್ರತಾ ವಲಯದ ನಡುವೆ ಸಾಗುತ್ತಿದ್ದು, ಮಂಗಳವಾರವೂ ಹೊಸತಾಗಿ 6,388 ಯಾತ್ರಿಕರ ಸಮೂಹ ಪಯಣ ಕೈಗೊಂಡಿದೆ.
ಭಗವತಿ ನಗರ ಯಾತ್ರಿ ನಿವಾಸದಿಂದ 103 ವಾಹನಗಳಲ್ಲಿ 2,501 ಯಾತ್ರಿಗಳು ಬಾಲ್ಟಾಲ್ ಶಿಬಿರದತ್ತ ಬೆಳಿಗ್ಗೆ 3.26ಕ್ಕೆ ಹೊರಟರೆ, 145 ವಾಹನಗಳಲ್ಲಿ 3,887 ಯಾತ್ರಿಗಳು ನುನ್ವಾನ್ (ಪಹಲ್ಗಾಮ್) ಶಿಬಿರದತ್ತ ಬೆಳಿಗ್ಗೆ 4.15ಕ್ಕೆ ಪ್ರಯಾಣಿಸಿದರು.
‘ಛಾರಿ ಮುಬಾರಕ್’ ಭೂಮಿ ಪೂಜೆ
ಜುಲೈ 10ರಂದು ಪಹಲ್ಗಾಮ್ನಲ್ಲಿ ‘ಛಾರಿ ಮುಬಾರಕ್’ (ಶಿವನ ಪವಿತ್ರ ಗದೆ) ಭೂಮಿ ಪೂಜೆ ನೆರವೇರಿತು. ಶ್ರೀ ದಶನಾಮಿ ಅಖಾರದ ಮಹಾಂತ್ ಸ್ವಾಮಿ ದೀಪೇಂದ್ರ ಗಿರಿ ನೇತೃತ್ವದ ಮಠಾಧೀಶರು ಈ ಧಾರ್ಮಿಕ ಕರ್ತವ್ಯ ನಿರ್ವಹಿಸಿದರು. ಈ ಛಾರಿ ಮುಬಾರಕ್ ಆಗಸ್ಟ್ 9ರಂದು ಪವಿತ್ರ ಗುಹಾದೇವಾಲಯ ತಲುಪುವುದರೊಂದಿಗೆ ಯಾತ್ರೆಯ ಅಧಿಕೃತ ಅಂತ್ಯ ಘೋಷಿಸಲ್ಪಡುವುದು.
ಈ ನಡುವೆ, ಭದ್ರತಾ ಕಾರಣಗಳಿಂದಾಗಿ ಈ ವರ್ಷ ಯಾತ್ರೆಗೆ ಯಾವುದೇ ಹೆಲಿಕಾಪ್ಟರ್ ಸೇವೆಗಳನ್ನು ನಿರ್ಬಂಧಿಸಲಾಗಿದೆ. ಎಲ್ಲಾ ಯಾತ್ರೆಗಳು ಭೂಮಾರ್ಗದ ಮೂಲಕವೇ ಸಾಗಬೇಕಿದೆ. ಈ ವರ್ಷದ ಯಾತ್ರೆ ಆಗಸ್ಟ್ 9ರಂದು ಶ್ರಾವಣ ಪೂರ್ಣಿಮೆಯಂದು ಕೊನೆಗೊಳ್ಳಲಿದೆ.
