ನವದೆಹಲಿ: ಜಪಾನ್ ಸರ್ಕಾರವು ಮುಂದಿನ 10 ವರ್ಷಗಳಲ್ಲಿ ಭಾರತದಲ್ಲಿ ಖಾಸಗಿ ವಲಯದ ಹೂಡಿಕೆ ಗುರಿಯನ್ನು 10 ಟ್ರಿಲಿಯನ್ ಯೆನ್ (ಸುಮಾರು 68 ಬಿಲಿಯನ್ ಡಾಲರ್) ಗೆ ದ್ವಿಗುಣಗೊಳಿಸುವ ಯೋಜನೆ ಘೋಷಿಸಲು ಸಜ್ಜಾಗಿದೆ. ಆಗಸ್ಟ್ 29ರಂದು ಟೋಕಿಯೋದಲ್ಲಿ ನಡೆಯುವ ಪ್ರಧಾನಿ ನರೇಂದ್ರ ಮೋದಿ ಮತ್ತು ಜಪಾನ್ ಪ್ರಧಾನಿ ಶಿಗೇರು ಇಶಿಬಾ ಅವರ ಶೃಂಗಸಭೆಯಲ್ಲಿ ಈ ನಿರ್ಧಾರ ಅಧಿಕೃತವಾಗಲಿದೆ.
ಈಗಾಗಲೇ 2022ರಲ್ಲಿ ಮಾಜಿ ಪ್ರಧಾನಿ ಫ್ಯೂಮಿಯೋ ಕಿಶಿದಾ ಘೋಷಿಸಿದ್ದ 5 ಟ್ರಿಲಿಯನ್ ಯೆನ್ ಹೂಡಿಕೆ ಗುರಿಯ ಮೇಲಾಗಿಯೇ ಹೊಸ ಗುರಿ ವಿಸ್ತರಣೆ ಆಗಲಿದೆ. ಮೋದಿ ಅವರ ಮೂರು ದಿನಗಳ ಜಪಾನ್ ಪ್ರವಾಸದಲ್ಲಿ, ಎರಡೂ ರಾಷ್ಟ್ರಗಳು ಅರೆವಾಹಕ ತಂತ್ರಜ್ಞಾನ, ಶುದ್ಧ ಇಂಧನ, ಕೃತಕ ಬುದ್ಧಿಮತ್ತೆ, ಸ್ಟಾರ್ಟ್‌ಅಪ್‌ಗಳು, ಪ್ರಮುಖ ಖನಿಜಗಳು ಮತ್ತು ಡಿಜಿಟಲ್ ಸಹಕಾರ ಕ್ಷೇತ್ರಗಳಲ್ಲಿ ಹೊಸ ಒಪ್ಪಂದಗಳನ್ನು ಪ್ರಕಟಿಸುವ ನಿರೀಕ್ಷೆಯಿದೆ.
ಇದೇ ವೇಳೆ, ಎರಡು ದೇಶಗಳು ಆರ್ಥಿಕ ಭದ್ರತಾ ಉಪಕ್ರಮವನ್ನು ಪ್ರಾರಂಭಿಸಲು, 2008ರಲ್ಲಿ ಸಹಿ ಮಾಡಿದ್ದ ಭದ್ರತಾ ಸಹಕಾರ ಘೋಷಣೆಯನ್ನು ನವೀಕರಿಸಲು ಹಾಗೂ ಕಾಯ್ಲೆ-ಮುಕ್ತ ಇಂಧನ ಸಹಕಾರ ಒಪ್ಪಂದ ಹೊರಡಿಸಲು ಸಹ ಚಿಂತನೆ ನಡೆಸುತ್ತಿವೆ.
ಮುಂಬೈ–ಅಹಮದಾಬಾದ್ ಬುಲೆಟ್ ರೈಲು ಯೋಜನೆಯ ಮುಂದಿನ ಹಂತದಲ್ಲಿ ಜಪಾನ್‌ನ E10 ಸರಣಿಯ ಶಿಂಕಾನ್ಸೆನ್ ರೈಲುಗಳನ್ನು ಪರಿಚಯಿಸಲು ಒಪ್ಪಂದವಾಗುವ ಸಾಧ್ಯತೆಯಿದೆ. ಸಭೆಗಳ ವೇಳೆ 100ಕ್ಕೂ ಹೆಚ್ಚು ತಿಳುವಳಿಕೆ ಪತ್ರಗಳಿಗೆ (MoU) ಸಹಿ ಹಾಕಲಾಗುವ ನಿರೀಕ್ಷೆಯಿದೆ.
