ಮಂಗಳೂರು: ಹಿರಿಯ ಯಕ್ಷಗಾನ ಕಲಾವಿದ, ಮಾಜಿ ಶಾಸಕ ಕುಂಬ್ಳೆ ಸುಂದರ್ ರಾವ್ ವಿಧಿವಶರಾಗಿದ್ದಾರೆ. ಅವರಿಗೆ ಶ್ರದ್ಧಾಂಜಲಿಯ ಮಹಾಪೂರವೇ ಹರಿದು ಬರುತ್ತಿದೆ. ತುಳುನಾಡಿನ ಯಕ್ಷಗಾನ ಪರಂಪರೆಯಲ್ಲಿ ದಿಗ್ಗಜ ಕಲಾವಿದರಾಗಿ ಗುರುತಾಗಿದ್ದ ಕುಂಬ್ಳೆ ಅವರಿನ್ನು ನೆನಪು ಮಾತ್ರ.
ಕರುನಾಡಿನ ಗಂಡುಕಲೆ ಯಕ್ಷಗಾನದ ಹಿರಿಯ ಕಲಾವಿದರಾಗಿದ್ದ ಅವರು, ಪೌರಾಣಿಕ ಪಾತ್ರಗಳಿಗೆ ಜೀವ ತುಂಬುತ್ತಿದ್ದರು. ಧರ್ಮಸ್ಥಳ ಯಕ್ಷಗಾನ ಮೇಳದಲ್ಲಿ ಯಾವುದೇ ಕಥಾ ಪ್ರಸಂಗವೇ ಇರಲಿ ಪ್ರಮುಖ ಪಾತ್ರವನ್ನು ಕುಂಬ್ಳೆ ಸುಂದರ ರಾವ್ ಅವರೇ ಮಾಡುತ್ತಿದ್ದರು. ಧರ್ಮಸ್ಥಳ ಕ್ಷೇತ್ರ ಮಹಾತ್ಮೆ ಪ್ರಸಂಗದಲ್ಲಿ ಇವರ ಅಭಿನಯವೇ ಆಕರ್ಷಣೆ ಎಂಬಂತಿತ್ತು.
ಯಾರಿವರು ಯಕ್ಷ ದಿಗ್ಗಜ.?
ಕಾಯರ್ಕಾಡಿ ಕುಂಞಕಣ್ಣ ಮತ್ತು ಕಲ್ಯಾಣಿ ದಂಪತಿ ಪುತ್ರ ಕುಂಬ್ಳೆ ಸುಂದರ ರಾವ್, 1934ರ ಮಾರ್ಚ್ 20ರಂದು ಕಾಸರಗೋಡು ಜಿಲ್ಲೆ ಕುಂಬಳೆಯಲ್ಲಿ ಜನಿಸಿದರು. ಸುರತ್ಕಲ್, ಧರ್ಮಸ್ಥಳ ಮತ್ತು ಇರಾ ಯಕ್ಷಗಾನ ಮೇಳಗಳಲ್ಲಿ ಕಲಾವಿದರಾಗಿ ಕಾರ್ಯನಿರ್ವಹಿಸಿದ್ದ ಅವರು, 1994ರಲ್ಲಿ ಆಗಿನ ಸುರತ್ಕಲ್ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿ ಹುರಿಯಾಳಾಗಿ ಸ್ಪರ್ಧಿಸಿ ಶಾಸಕರಾಗಿ ಆಯ್ಕೆಯಾಗಿದ್ದರು.
ಇವರ ಪ್ರತಿಭೆ, ಪಾತ್ರದಲ್ಲಿನ ಆಕರ್ಷಣೆ ಮೂಲಕವೇ ಅಭಿಮಾನಿಗಳ ಸಾಮ್ರಾಜ್ಯವನ್ನೇ ಅವರು ಕಟ್ಟಿದ್ದರು. ಈ ಮೂಲಕ ಪ್ರಭಾವಿಯಾಗಿದ್ದ ಇವರನ್ನು ದಕ್ಷಿಣ ಕನ್ನಡದ ಜನತೆ ಶಾಸಕರನ್ನಾಗಿ ಆಯ್ಕೆ ಮಾಡಿದ್ದರು. ಕರ್ನಾಟಕ ರಾಜ್ಯ ಯಕ್ಷಗಾನ ಅಕಾಡೆಮಿಯ ಅಧ್ಯಕ್ಷರಾಗಿಯೂ ಕುಂಬ್ಳೆ ಸುಂದರ ರಾವ್ ಅವರು ಸೇವೆ ಸಲ್ಲಿಸಿದ್ದರು.
ಇಳಿ ವಯಸ್ಸಿನಲ್ಲಿಯೂ ಯಕ್ಷಗಾನ ಕ್ಷೇತ್ರದಲ್ಲಿ ತಮ್ಮದೇ ಆದ ಅಭಿನಯ ಕೌಶಲ್ಯ ಪ್ರದರ್ಶಿಸುತ್ತಿದ್ದ ಕುಂಬ್ಳೆ ಸುಂದರ ರಾವ್ ಅವರು ಇನ್ನು ನೆನಪು ಮಾತ್ರ. ಕುಂಬ್ಳೆ ಸುಂದರ ರಾವ್ ಅವರ ನಿಧನಕ್ಕೆ ಗಣ್ಯರು ಕಂಬನಿ ಮಿಡಿದಿದ್ದಾರೆ.
