ಬೆಂಗಳೂರು: ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಮಹಿಳಾ ನಟಿಯರನ್ನು ಅನುಚಿತ ಕೋನಗಳಿಂದ ಚಿತ್ರೀಕರಿಸಿ, ಉದ್ದೇಶಪೂರ್ವಕ ಜೂಮ್-ಇನ್ಗಳ ಮೂಲಕ ದೃಶ್ಯಗಳನ್ನು ಪ್ರಸಾರ ಮಾಡುವ ಪ್ರಕ್ರಿಯೆಯನ್ನು ನಟಿಯರಾದ ರುಕ್ಮಿಣಿ ವಸಂತ್ (Rukmini Vasanth), ಆಶಿಕಾ ರಂಗನಾಥ್ (Ashika Ranganath) ಮತ್ತು ಸಪ್ತಮಿ ಗೌಡ (Saptami Gowda) ತೀವ್ರವಾಗಿ ಖಂಡಿಸಿದ್ದಾರೆ.
ಮಂಗಳವಾರ ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಕಟಿಸಿದ ಒಗ್ಗಟ್ಟಿನ ಹೇಳಿಕೆಯಲ್ಲಿ ನಟಿಯರು, “ಚಲನಚಿತ್ರೋದ್ಯಮದ ಮಹಿಳೆಯರಾಗಿ ನಾವು ಪುನರಾವರ್ತಿತ ಸಮಸ್ಯೆಯನ್ನು ಎದುರಿಸುತ್ತಿದ್ದೇವೆ. ಪದೇ ಪದೇ, ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಮಹಿಳಾ ನಟಿಯರನ್ನು ಸೂಕ್ತವಲ್ಲದ ಕೋನಗಳಿಂದ ಚಿತ್ರೀಕರಿಸಲಾಗುತ್ತದೆ. ಅನಗತ್ಯ ಜೂಮ್ಗಳು ನಮ್ಮ ಕೆಲಸದ ಬದಲು ನಮ್ಮ ದೇಹದ ಮೇಲೆ ಕೇಂದ್ರೀಕರಿಸುತ್ತವೆ,” ಎಂದು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
“ಕೆಲವು ವ್ಯಕ್ತಿಗಳ ಈ ನಡವಳಿಕೆ ಅಗೌರವಕಾರಿ ಹಾಗೂ ಸಂಪೂರ್ಣವಾಗಿ ಅಸ್ವೀಕಾರಾರ್ಹ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಉದ್ದೇಶಪೂರ್ವಕ ಜೂಮ್-ಇನ್ಗಳು ಮತ್ತು ಅನುಚಿತ ಕೋನಗಳನ್ನು ಘನತೆಯ ಉಲ್ಲಂಘನೆ ಎಂದು ಕರೆಯಿರುವ ನಟಿಯರು, “ಇವುಗಳನ್ನು ಸಾಮಾನ್ಯಗೊಳಿಸಲಾಗುವುದಿಲ್ಲ ಅಥವಾ ಸಹಿಸಲಾಗುವುದಿಲ್ಲ. ಕಾರ್ಯಕ್ರಮಗಳನ್ನು ವರದಿ ಮಾಡುವವರು ವೃತ್ತಿಪರತೆ, ಮೂಲಭೂತ ಗೌರವ ಮತ್ತು ಸಭ್ಯತೆಯನ್ನು ಕಾಪಾಡಿಕೊಳ್ಳಬೇಕು,” ಎಂದು ಆಗ್ರಹಿಸಿದ್ದಾರೆ.
ಇನ್ಸ್ಟಾಗ್ರಾಮ್ ಕಥೆಗಳ ವಿಭಾಗದಲ್ಲಿ ಹೇಳಿಕೆಯನ್ನು ಹಂಚಿಕೊಂಡ ಆಶಿಕಾ ರಂಗನಾಥ್ (Ashika Ranganath), “ಗೌರವವನ್ನು ಸಾಮಾನ್ಯಗೊಳಿಸೋಣ – ಉಲ್ಲಂಘನೆಯನ್ನು ಅಲ್ಲ” ಎಂದು ಸಂದೇಶ ನೀಡಿದ್ದಾರೆ.
ಸಪ್ತಮಿ ಗೌಡ (Saptami Gowda) ಕನ್ನಡದಲ್ಲಿ ಪ್ರಕಟಿಸಿದ ಹೇಳಿಕೆಯಲ್ಲಿ, “ಅಪಾರ ಗೌರವ ತೋರಿದ ಪತ್ರಕರ್ತರು ಮತ್ತು ಮಾಧ್ಯಮ ಸ್ನೇಹಿತರು ಇದ್ದಾರೆ. ಅವರೊಂದಿಗೆ ನಾವು ಸುರಕ್ಷಿತವೆಂದು ಭಾವಿಸಿದ್ದೇವೆ. ಆದರೆ ಮಹಿಳೆಯರನ್ನು ಅನುಚಿತವಾಗಿ ಸೆರೆಹಿಡಿಯುವ ಬೆರಳೆಣಿಕೆಯಷ್ಟು ಜನರ ವಿರುದ್ಧ ನಮ್ಮೊಂದಿಗೆ ನಿಲ್ಲಬೇಕು,” ಎಂದು ಮನವಿ ಮಾಡಿದ್ದಾರೆ.
ನಟಿಯರು ಹೊರಡಿಸಿದ ಈ ಹೇಳಿಕೆಯನ್ನು ಕನ್ನಡ ನಟ ಡಾಲಿ ಧನಂಜಯ (Dolly Dhananjay) ಸಹ ಹಂಚಿಕೊಂಡಿದ್ದು, ಚಿತ್ರರಂಗದಲ್ಲಿ ಗೌರವಯುತ ವರ್ತನೆಗಾಗಿ ಧ್ವನಿಯೊಂದು ಎದ್ದಿದೆ.
