ಮುಂಬೈ: ಜನಪ್ರಿಯ ದಕ್ಷಿಣ ಭಾರತೀಯ ನಟಿ ಸಮಂತಾ ರುತ್ ಪ್ರಭು 2026ರತ್ತ ಸ್ಪಷ್ಟ ಉದ್ದೇಶ ಮತ್ತು ಆತ್ಮಾವಲೋಕನದೊಂದಿಗೆ ಕಾಲಿಡಲು ಸಜ್ಜಾಗಿದ್ದಾರೆ. ಇತ್ತೀಚೆಗೆ ಚಲನಚಿತ್ರ ನಿರ್ಮಾಪಕ ರಾಜ್ ನಿಧಿಮೋರು ಅವರನ್ನು ವಿವಾಹವಾದ ಬಳಿಕ, ತಮ್ಮ ಮುಂದಿನ ವರ್ಷದ ವೈಯಕ್ತಿಕ ಹಾಗೂ ವೃತ್ತಿಪರ ಸಂಕಲ್ಪಗಳನ್ನು ಸಾಮಾಜಿಕ ಮಾಧ್ಯಮದ ಮೂಲಕ ಹಂಚಿಕೊಂಡಿದ್ದಾರೆ.
ಜೀವನವನ್ನು ಸ್ವಲ್ಪ ನಿಧಾನಗೊಳಿಸಿ, ಹೆಚ್ಚು ಅರ್ಥಪೂರ್ಣ ಹಾಗೂ ಆಳವಾದ ಸಂಬಂಧಗಳನ್ನು ಬೆಳೆಸಿಕೊಳ್ಳಲು ಗಮನಹರಿಸುವುದಾಗಿ ಸಮಂತಾ ತಿಳಿಸಿದ್ದಾರೆ. ನಗುತ್ತಿರುವ ತಮ್ಮ ಚಿತ್ರವೊಂದನ್ನು ಹಂಚಿಕೊಂಡ ಅವರು, “ಕೃತಜ್ಞತೆ, ದೀರ್ಘಾಯುಷ್ಯಕ್ಕಾಗಿ ಶ್ರಮ, ಆಳವಾದ ಸಂಪರ್ಕಗಳು, ಸಮಾಜಕ್ಕೆ ಹಿಂತಿರುಗಿ ಕೊಡುವ ಮನೋಭಾವ, ಒಳಗೆ ಕೇಳಿಕೊಳ್ಳುವುದು, ಸ್ಥಿರವಾದ ಕೆಲಸ ಹಾಗೂ ನಿರಂತರ ಬೆಳವಣಿಗೆ, ಉದ್ದೇಶದೊಂದಿಗೆ ಹೊಂದಿಕೆಯಾಗುವುದು” ಎಂಬ ಅಂಶಗಳನ್ನು 2026ರ ಸಂಕಲ್ಪಗಳಾಗಿ ಉಲ್ಲೇಖಿಸಿದ್ದಾರೆ.
ಇತ್ತೀಚೆಗೆ ಸಮಂತಾ–ರಾಜ್ ನಿಧಿಮೋರು ದಂಪತಿ ಕೊಯಮತ್ತೂರಿನ ಇಶಾ ಫೌಂಡೇಶನ್ನಲ್ಲಿ ಆಪ್ತ ಕುಟುಂಬ ಸದಸ್ಯರ ಸಮ್ಮುಖದಲ್ಲಿ ಸಾಂಪ್ರದಾಯಿಕವಾಗಿ ವಿವಾಹವಾದರು. ಡಿಸೆಂಬರ್ 1ರಂದು ತಮ್ಮ ವಿವಾಹವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಅಧಿಕೃತವಾಗಿ ಘೋಷಿಸಿದ ಸಮಂತಾ, ಮದುವೆಯ ಕ್ಷಣಚಿತ್ರಗಳನ್ನು ಹಂಚಿಕೊಂಡಿದ್ದರು. ಮದುವೆಯ ನಂತರ ದಂಪತಿ ಮುಂಬೈನಲ್ಲಿ ಮೊದಲ ಬಾರಿ ಸಾರ್ವಜನಿಕವಾಗಿ ಕಾಣಿಸಿಕೊಂಡರು.
ಸಮಂತಾ ಮತ್ತು ರಾಜ್ ನಿಧಿಮೋರು ವೃತ್ತಿಪರವಾಗಿ ಮೊದಲ ಬಾರಿಗೆ ಅಮೆಜಾನ್ ಪ್ರೈಮ್ ವಿಡಿಯೋ ಸರಣಿ ದಿ ಫ್ಯಾಮಿಲಿ ಮ್ಯಾನ್–2 ನಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು. ಬಳಿಕ ಸಿಟಾಡೆಲ್: ಹನಿ ಬನ್ನಿ ವೆಬ್ ಸರಣಿಯಲ್ಲೂ ಅವರ ಸಹಕಾರ ಮುಂದುವರಿದಿತ್ತು.
ಈ ಹಿಂದೆ ಸಮಂತಾ 2017ರಲ್ಲಿ ನಟ ನಾಗ ಚೈತನ್ಯ ಅವರನ್ನು ವಿವಾಹವಾಗಿದ್ದು, 2021ರಲ್ಲಿ ಇಬ್ಬರೂ ಪರಸ್ಪರ ಒಪ್ಪಿಗೆಯಿಂದ ಬೇರ್ಪಟ್ಟಿದ್ದರು. ನಾಗ ಚೈತನ್ಯ ಕಳೆದ ವರ್ಷ ಡಿಸೆಂಬರ್ನಲ್ಲಿ ನಟಿ ಸೋಭಿತಾ ಧುಲಿಪಾಲ ಅವರನ್ನು ವಿವಾಹವಾಗಿದ್ದಾರೆ.
